13 сентября 2016 г.
Шупашкарти Юрăçсен уйĕнче СССР летчик-космонавтне, Совет Союзĕн икĕ хут Геройне Андриян Николаева асăнса «Советская Чувашия» хаçат эстафети иртнĕ. Çăмăл атлетсен эстафетине спорта юратакан 1700 яхăн çын хутшăннă. Командăсен йышĕнче _ регионти ĕç тăвакан влаç органĕсен ертỹçисем, муниципал районĕсемпе хуласенчи администраци пуçлăхĕсем, республикăри тата районсенчи массăллă информаци хатĕрĕсен тĕп редакторĕсем. Пресса командисем хушшинче Чăваш Наци радио команди _ пĕрремĕш, Вăрмар районĕнчи «Хĕрлĕ ялав» хаçат редакцийĕн команди _ иккĕмĕш, Чăваш Наци телевиденийĕн команди _ виççĕмĕш вырăн йышăннă. Чăваш Республикин информаци политикипе массăллă коммуникацисен министрĕ Александр Иванов «Советская Чувашия» хаçатăн 78-мĕш эстафети çỹллĕ шайра иртнине палăртнă. Республикăри прессăн спорт фестивалĕн малтанхи тапхăрĕ районсенче иртнĕ. Пирĕн район чысне Шупашкарта район администрацийĕн тата Шăмăршăри вăтам шкулпа Пуянкассинчи тĕп шкул командисем хỹтĕленĕ. Шăмăршăри вăтам шкулăн туслă команди эстафета чупăвĕнче тăваттăмĕш вырăн йышăннă. Пуянкассисем те хула ачисенчен япăх ăмăртман, тĕп шкулсем хушшинче чи вăйлă 15 команда йышне кĕнĕ.
В.АНТОНОВ.