Новости » Республика уява хатĕр

Республика кунĕ умĕн ăна хатĕрленсе ирттерес енĕпе ĕçлекен йĕркелÿ комитечĕ пĕтĕмлетÿ ларăвне ирттернĕ. Ăна Чăваш Ен Пуçлăхĕ Михаил Игнатьев ертсе пынă.

Чи малтанах ЧР Культура министрĕ Вадим Ефимов уявăн культура программипе паллаштарнă. Пĕтĕм Раççейри халăх пултарулăхĕн «Раççей çăл куçĕсем» фестивальне кăçалхипе 21-мĕш хут йĕркелеççĕ. Раççейĕн 27 регионĕнчен – 29, Беларуçрен 1 коллектив килме кăмăл тунă, пĕтĕмпе – 700 çын. Вĕсем халăха хăйсен пултарулăхĕпе икĕ кун савăнтарĕç. «Руç ăстисем» конкурса та Раççейĕн тĕрлĕ кĕтесĕ-нчи ăстасем хутшăнассине пĕлтернĕ, çĕнтерÿçĕсене вунă номинацире чыслĕç. Пĕтĕм чăвашсен «Акатуй» наци уявĕ те асра юлмалла иртмелле. Унта Раççейĕн 16 субъектĕнчен тата Беларуçрен килнĕ 20, Чăваш Енри 53 коллектив юрлĕ-ташлĕ, çынсене вăйă картине тăма йыхравлĕ. «Театрсен каçĕ» – халĕччен пулман çĕнĕлĕх: республикăри театрсем хăйсен спектаклĕ-семпе паллаштарĕç.

Пĕтĕм тĕнчери фейерверксен VI фестивальне Шупашкарти, Мускаври, Санкт-Петербургри, Беларуçри тата Литвари 5 команда хутшăнĕ. Тĕрлĕ тĕслĕ çутă илемĕпе Атăл çыранĕпе акваторийĕнче икĕ кун киленме май килĕ.

ЧР Строительство министрĕн тивĕçĕсене пурнăçлакан Иван Новиков Республика кунĕ умĕн хута яма палăртнă объектсем мĕнле тăрăмра пулни пирки каласа кăтартнă. Уяв кунĕсенче Шупашкарта, Çĕнĕ Шупашкарта, Канашра, Шупашкар районĕнче пурăнмалли çĕнĕ çуртсене савăнăçлă лару-тăрура уçĕç. Унсăр пуçне çак кунсенче тĕрлĕ çĕрте модуль фельдшер-акушер пункчĕсене, Тăвайра газ участокĕн сервис центрне, Красноармейскинче «Трак керамики» завода, Вăрмар районĕнче вăтам шкул çуртне тата ытти объекта хута яма палăртнă.

И.КЛЕМЕНТЬЕВА.