Новости » Предпринимательсен кунĕ

ÇАК кунсенче район администрацийĕнче пĕчĕк тата вăтам предпринимательство кунĕ пулса иртнĕ. Ăна уçнă май экономика пайĕн ертÿçи Э.Жамкова çак мероприятин пĕлтерĕшĕ пысăк пулнине палăртнă. Бизнеса, инфраструктурăна аталантарасси çакăнтан та нумай килет. Вĕсем – тăван районăмăрăн пуласлăхĕ.

Пĕчĕк предпринимательство экономикăн пĕтĕм отраслĕнче палăрать. Ытларах пайĕ – суту-илÿре тата обществăлла апатлану предприятийĕсенче, ял хуçалăхĕнче, промышленноçра, строительствăра. Кăçалхи январь-август уйăхĕсенче кăна пĕчĕк предпринимательство объекчĕсем 2990, вăл шутран хăй тĕллĕн ĕçлекен предпринимательсем 250 шутланнă. Хресчен (фермер) хуçалăхĕсем вара – 65.

Кăçал пĕчĕк предприниматель объекчĕсем 52 миллион тенкĕлĕх продукци сутнă, ăсатнă. Ку кăтарту пĕлтĕрхинчен ытларах. Ял хуçалăх производствинче инвестици проекчĕсене пурнăçлама тытăннине те палăртса хăвармалла. Вĕсем ытларах выльăх-чĕрлĕх фермисемпе çыхăннă.

Предпринимательсен кунне Чăваш Республикин Экономика аталанăвĕн министерствин специалисчĕсем те хутшăннă, республикăра предпринимательлĕхе пулăшма палăртнă майсемпе паллаштарнă.

Пенси страхованийĕн фондĕнче те улшăнусем пур. Вĕсемпе те паллашрĕç предпринимательсем. Налук законодательствинчи çĕнĕлĕхсем пирки пĕлни те пуриншĕн те вырăнлă, усăллă. Малашне предпринимательсем «Россельхозбанк» тата «Раççей перекет банкĕ» ОАОсен районти уйрăмĕсем кредитсем памалли йĕркесене те малтанах пĕлсе тăрĕç.

Хамăр корр.