Новости » Йывăç кунĕ

Палтиелĕнчи пĕтĕмĕшле пĕлÿ паракан вăтам шкулта педагогсем ачасене кăмăл-сипет тата экологи воспитанийĕ парассине пысăк тимлĕх уйăраççĕ. Акă çак кунсенче шкулта Йывăç кунĕ иртрĕ.

Йăлана кĕнĕ тăрăх, экологи мероприятине çулленех 11 класра вĕренекенсем хутшăнаççĕ. Вĕсем шкул территорийĕнче çамрăк хунавсем лартса хăварчĕç. Экологи акцине Палтиел участок лесничествин лесничийĕ А.Цыганов тата И.Хамдеевпа В.Чернов вăрман мастерĕсем йĕркелесе-ертсе пычĕç.

Вĕренÿ учрежденийĕнче педагогсем ачасене пĕчĕкрен çут çанталăка, тăван тăрăха юратма хăнăхтараççĕ. Ку темăпа кăçал, Çут çанталăка упрамалли çулталăк пулнă май, класс сехечĕсем, ытти мероприятисем нумай иртеççĕ. Практика ĕçĕ – хунавсем лартни тата пĕлтерĕшлĕрех. Ачасем хăйсен аллипе йывăçсем лартсан, вĕсем ăна тĕрĕс-тĕкел ÿстерсе çитĕнтерме тата упрама тăрăшаççĕ. Пĕрлех тăван тавралăх илемне хăйсен хÿтлĕхне илеççĕ. Экологи акцийĕ шăпах ачасене тăван тавралăха упрама вĕрентессипе çыхăннă та ĕнтĕ.

С.САНДРКИНА.