09:38 16 февраля 2016 г.
ОЛЕГ МУСТАЕВ, Ульяновск облаçĕн телевиденийĕнчи "Çĕнĕ ĕмĕр" наци телепрограммисен тĕп редакторĕ, Чăваш çамрăкĕсен Çеçпĕл Мишши ячĕллĕ премийĕн лауреачĕ.
-2015 ÇУЛТА Шăмăршăра Чăваш Республикипе Ульяновск облаçĕн Туслăх кунĕ иртрĕ. Хамăрăн пысăк делегаци йышĕпе эпĕ те çак уява хутшăннăччĕ. Тỹрех калатăп, Шăмăршă районĕ мана питĕ килĕшрĕ. Район центрĕпе ялĕсем тирпей-илемшĕн тăрăшаççĕ, çутçанталăк пуянлăхне упрама пĕлеççĕ. "Чăваш вăрманĕ" наци паркĕ - Шăмăршă районĕшĕн çеç мар, пĕтĕм чăваш халăхĕшĕн чаплă управ. Ахальтен мар ĕнтĕ кунта туристсем те йышлă килеççĕ. Ульяновскри телевидени Шăмăршăра иртнĕ уяв çинчен ятарлă передача хатĕрлерĕ. Çывăх вăхăтра "Чăваш вăрманĕ" наци паркĕ - Чăваш çĕршывĕн ахахĕ" ятпа çулçỹрев очеркĕсен ярăмне эфира кăларасшăн эпир. Шăмăршăсене социаллă пурнăçпа экономикăна аталантарас ĕçре çĕнĕ çитĕнỹсем сунатăп.
ВЛАДИМИР СЕМЕНОВ, Раççей спорт мастерĕ, Чăваш Республикинчи физкультурăпа спортăн тава тивĕçлĕ ĕçченĕ, Шупашкар хули.
-ШĂМĂРШĂСЕМШĔН савăнатăп, шăмăршăсене мухтатăп! Ырă ĕçĕсемшĕн, мухтанмасăр, лăпкăн та сăпайлăн района илемлетсе пынишĕн тав тăватăп. Района Шупашкар енчен килекенсем чăн малтан Карапай Шăмăршăпа Çĕнĕ Тăрăн ялĕсенче кермен пек илемлĕ çуртсем асăрхаççĕ. Паллах, тар тăкса ĕçлемесĕр ырлăх-пурлăх тума çук. Ỹркенмен çынсене - чыс та мухтав!
ВАЛЕРИ ТУРКАЙ, Чăваш халăх поэчĕ.
-ÇАК кунсенче эпĕ Шăмăршăран аякра вырнаçнă илемлĕ ялта - Анат Чаткасра пултăм. Çав тери ырă çынсем пурăнаççĕ кунта. Ĕçлеме те, канма та пĕлеççĕ, спорта юратаççĕ. Çурчĕсем те чаплă, хĕл кунĕсенче те урамсем илемлĕ. Çакă савăнтарчĕ тата: чаткассем тăван чĕлхе пуянлăхне упраççĕ, чăваш çыравçисен кĕнекисене юратса вулаççĕ.
АУ ЧР «Редакция Шемуршинской районной газеты «Шăмăршă хыпарĕ» ("Шемуршинские вести") Министерства информационной политики и массовых коммуникаций Чувашской Республики