09:37 14 июля 2017 г.
Чăваш Енре кадет корпусне уçасси пирки мĕн шутлаççĕ-ха пирĕн ентешсем?
Юрий ЕРМОЛАЕВ,
Карапай Шăмăршăри вăтам шкул директорĕ:
- Раççей Сывлăш-комос çарĕсем валли специалистсем кирлине шута илсе, Шупашкарта кадет корпусне уçма палăртнă. Çак йышăнăва эпĕ чунтан ырлатăп.
Кадетсем - Тăван çĕршыва хỹтĕлекен офицер пулмалли çамрăксем. Вĕсем çарпа спорт енчен чăн-чăн пиçĕхỹ илччĕр тесен, кадетсен корпусĕ çар училищи пекех пулмалла тесе шуталтăп.
Çак корпусра пирĕн район çамрăкĕсем те тивĕçлĕ воспитани илессе çирĕп шанатăп.
Наталия МОРОЗОВА,
3 ывăл амăшĕ:
- Пирĕн тăван хуламăрта - Шупашкарта - ачасем валли кадет корпусĕ çĕклеме пуçлани мана, 3 ывăл амăшне, çав тери савăнтарать. Питĕ тăрăшса пăхăпăр, çак шкула виçĕ ывăлтан пĕри те пулсан вĕренме кайма кăмăл тăвасса.
Хальхи вăхăтра пирĕн ачасене дисциплинăпа çирĕплĕх çитмест. Эпĕ шутлатăп, çакăн евĕрлĕ шкулсенче ачасем хăйсен умне тĕллев лартма, мĕн шухăшланине пурнăçа кĕртме вĕренĕç. Вĕсем çирĕп сывлăхлă та Тăван çĕршыва юратакан çынсем пуласса шанса тăратăп. Ачасем - пирĕн пуласлăх, пирĕн хỹтлĕх. Çавăнпа та вĕсем чăн-чăн арçынсем, чăн-чăн патриотсем пулса ỹсессе ĕмĕтленсе пурăнатăп.
Чăваш Республикин Пуçлăхне Михаил Васильевич Игнатьева тăван халăхшăн тунă ырă ĕçĕсемшĕн чĕререн тав тăвас килет.
АУ ЧР «Редакция Шемуршинской районной газеты «Шăмăршă хыпарĕ» ("Шемуршинские вести") Министерства информационной политики и массовых коммуникаций Чувашской Республики