15:26 21 августа 2017 г.
ИРТНĔ эрнере хĕвеллĕ те илемлĕ çанталăк тăчĕ. Ял ĕçченĕсемшĕн çав тери пысăк савăнăç ку: çу хутах çумăр çуса тарăхтарнă хыççăн тинех халăх çăмăллăн сывласа ячĕ.
Уяр çанталăкра район кĕр тыррисене тирпейлĕ пуçтарса кĕртрĕ, кашни гектартан вăтамран вăтăршар центнер тухăç илнĕ. Тырă йĕтем çине типĕ кĕчĕ, сортировка витĕр кăларсан нỹрĕк хисепĕ тата та чакать.
Олег Хлюкин фермер хуçалăхĕнче урпана икĕ Дон комбайнпа тӳрремĕнех вырса çапаççĕ. Валерий Емельянов хăйне пулăшакан Сергей Сидоровпа, Валерий Ефимов Алексей Осиповпа яра кунах тухăçлă ĕçлеççĕ.
- Элеватора 50 тонна кĕрхи тулă леçрĕмĕр, - терĕ Виктор Александров управляющи. - Хакĕ тивĕçтермерĕ те, хальлĕхе сутма чарăнтăмăр-ха.
Йĕтеме килнĕ тырра çийĕнчех тасатса склада кĕртеççĕ. Николай Семенов машинист, Елена Ефимова, Зоя Никонорова, Галина Деомидова, Алина Сидорова, Николай Кириллов, Павел Петьков ĕçре питĕ правур.
Фермер хуçалăхĕ выльăх-чĕрлĕхе ăнăçлă хĕл каçарма хатĕрленсе çитнине те палăртма кăмăллă. Витесем юсавлă, механизмсем йĕркеллĕ ĕçлеççĕ.
450 тонна утă хатĕрленĕ, пĕлтĕрхи те чылай-ха. Люцернăна иккĕмĕш хут çулнă хыççăн утă саппасĕ ỹссех пырать.
- Хальхи вăхăтра мăйракаллă шултра выльăхсен йышĕ 82 пуç, - каласа парать Виктор Александров управляющи. - Хĕле кĕриччен тата таса ăратлă 90 пуç пушмак пăру туянатпăр. Çавна май выльăх апатне нумайрах хатĕрлеме тăрăшатпăр.
Эрнекун эпир Олег Павлов фермер хуçалăхĕпе те паллашрăмăр. Олег Зиновьевич кĕрхи тулă гектартан 40-шер центнера яхăн тухни çинчен савăнса пĕлтерчĕ. 80 гектар çинчи урпа та 46-шар центнер тухăç панă. Пухса кĕртмелли тата 50 гектар çурхи тулă юлнă.
- Кĕракине тухма та вăхăт çитсе пырать, - терĕ Олег Павлов. - Кĕрхи тулă 30 гектартан кая мар акатăп. Çĕр хатĕр, вăрлăх çителĕклĕ. Эпĕ пĕр гектар тырра та минерал удобренийĕсĕр акман. Çĕнĕ сортсем туянатăп.
Фермер ылтăн алăллă специалист пулнине те палăртас килет. Хăйĕн аллипе минерал удобренийĕ салатакан агрегат ăсталанă. Заводра туса кăларниччен пĕрре те кая мар, шанчăклăрах та. Бункера 800 килограмм удобрени кĕрет.
Олег Павлов арендăна илнĕ çĕр Тутарстанпа чикĕленет. Юнашарах кỹршĕ республика механизаторĕсем ĕçлеççĕ. Хăватлă KLASS комбайнсем тырă хирĕпе тинĕсри карапсем пек пыраççĕ.
- Тутарсем - пирĕншĕн ырă тĕслĕх, - тет фермер. - Вĕсем те пиртен тĕслĕх илеççĕ: эпир пуринчен малтан хире тухса кун тĕттĕмленичченех ĕçлетпĕр вĕт-ха. Урăхла ĕçлеме юрамасть - кашни сехет ылтăн пек хаклă.
Вăй патăр сире, тар тăкса çитĕнтернĕ пуянлăха алла илессишĕн ырми-канми тăрăшакан çĕр ĕçченĕсем.
Ив. САЛАНДАЕВ.
АУ ЧР «Редакция Шемуршинской районной газеты «Шăмăршă хыпарĕ» ("Шемуршинские вести") Министерства информационной политики и массовых коммуникаций Чувашской Республики