13 сентября 2008 г.
...РАЙОНТИ Акатуй сцени çине Карапай Шăмăршă купăсçисем васкамасăр хăпарчĕç те, чи хĕрринче тăракан патвар хул-çурăмлă арçын ерипен пуç сĕлтсе илсен хыр вăрманĕ çийĕн чăвашсен ташă кĕвви илемлĕн юхса саланчĕ. Хитре çемĕсем пĕр-пĕринпе ылмашăнса пынă май, уява килнĕ çынсен чун-чĕринче ăшă та ачаш туйăмсем юлчĕç. Çапла, В.П.Столяров ертсе пыракан купăсçăсен ансамблĕ яланхи пекех пысăк ăсталăх кăтартрĕ. Виталий Петрович уяв концерчĕ пыракан сцена çине татах та хăпарчĕ – ялти фольклор коллективне аккомпаниатор пулса ертсе пычĕ. Ялти Культура çуртĕнче иртекен кашни концертах хастар хутшăнать ĕç ветеранĕ, ял-йыша хăйĕн пултарулăхĕпе савăнтарать.
В.П.Столяров – Карапай Шăмăршăри чи сумлă çынсенчен пĕри. Хăйĕн ĕçченлĕхĕпе, сăпайлăхĕпе, чун-чĕрин илемлĕхĕпе вăл ялти тата районти хисеплĕ çынсен йышне кĕнĕ. Виталий Петрович – 2 орденпа 2 медаль кавалерĕ.
В.П.Столяров 1938 çулхи сентябрĕн 13-мĕшĕнче Карапай Шăмăршă ялĕнчи колхозниксен çемйинче çуралнă. Виталие тата ытти ачисене – вĕсем пурĕ пилллĕкĕн пулнă – ашшĕпе амăшĕ пĕчĕкренех ĕçе хăнăхтарса ÿстернĕ. Вĕсем çуллахи каникул кунĕсенче куллен колхоз ĕçĕсене те хастар хутшăннă.
Ялти 7 çул вĕренмелли шкултан вĕренсе тухсан мал ĕмĕтлĕ Виталий Шăмăршăри вăтам шкулта пĕлÿ пухнă. 1957 çулта вăтам пĕлÿллĕ каччăна çар службине илнĕ. Службăри çарпа политика вĕренĕвĕнчи çитĕнÿсемшĕн чаç командованийĕ ăна Мухтав хучĕпе чысланă.
1960 çулта служба срокне вĕçлесе тăван яла таврăнсан В.П.Столяров пĕр хушă колхоз утарçин пулăшуçинче вăй хунă. 1962 çултанпа вара унăн пĕтĕм пурнăçĕ руководитель должноçĕсемпе çыхăнса кайнă. Çак çул ăна колхозри уй-хир бригадин бригадирĕ пулма çирĕплетнĕ. Ку çулах унăн пурнăçĕнче пысăк улшăну пулса иртнĕ – Патăрьел районĕнчи Ясная Поляна ялĕнчи ĕçчен те сăпайлă хĕрпе Клавтипе пĕр çемьене пĕрлешнĕ. Улатăр вăрман хуçалăхĕнче ĕçленĕскер, качча тухнă хыççăн çамрăк хĕрарăм Киров ячĕллĕ колхоз ферминче вăй хунă.
Бригадир должноçĕнче çулран-çул ăнăçлăн та пултаруллăн ĕçлесе пынă çамрăк бригадир. Виталий Петрович ертсе пыракан уй-хир бригади çуллен тухăçлă тыр-пулă, çĕрулми çитĕнтернĕ. Ĕçри çитĕнÿсемшĕн В.П.Столярова 1973 çулта «Хисеп палли» орденпа наградăланă. Тепĕр 3 çултан вăл каллех çакнашкал ордена тивĕçнĕ. Ăна ВДНХн бронза медалĕпе те чысланă. Виталий Петровичăн ятне районти Хисеп кĕнекине кĕртнĕ. Вăрнарти совхоз-техникумра заочнăй майпа вĕренсе бригадир агроном дипломне илнĕ.
Руководитель пултарулăхĕпе хастарлăхне кура 1977 çулхи январьте В.П.Столярова ял-йыш ял Совечĕн председательне суйланă. Çак должноçра та вăл тÿрĕ кăмăлпа ĕçлесе пынă, халăх шанăçне яланах тÿрре кăларма тăрăшнă, Карапай Шăмăршăпа Çĕнĕ Тăрăн ялĕсен социаллă аталанăвне пысăк тимлĕх уйăрнă. 1981 çулта «Василек» ача сачĕ уçăлнă, 1984 çулта вăтам шкулăн 2 хутлă çĕнĕ çурчĕ хута кайнă, 1990 çулта Çĕнĕ Тăрăнта асфальтлă çул сарнă. Кунсăр пуçне йывăç кĕперсене тимĕрпе бетонран тунисемпе ылмаштарнă. 1990-мĕш çулсен пуçламăшĕнче çамрăксен çĕнĕ урамĕсем уçăлнă, газификаци ĕçĕсене пуçăннă. Ял пуçлăхĕн должноçĕнче ăнăçлă ĕçленĕшĕн Виталий Петровича «Ĕçри хастарлăхшăн» медаль парса хисепленĕ. 1999 çулхи январьте вăл тивĕçлĕ канăва тухнă.
Мăшăрĕпе, Клавдия Тимофеевнăпа, 3 ывăл ÿстерсе çитĕнтернĕ. Вĕсем пурте çемьеллĕ, хăйсем килĕштернĕ ĕçре вăй хураççĕ. Столяровсене 6 мăнук пысăк савăнăç кÿрсе тăрать.