20 сентября 2008 г.
ИРÇЕ ТĔККИНЧЕ пурăннă Виктор Бильтяев темиçе хутчен те судпа айăпланнă пулнă. Юлашкинчен ăна Шăмăршă район сучĕ 2001 çулхи июлĕн13-мĕшĕнче 4 çуллăха çирĕп режимлă колоние ямалла тунă. «Пит аякрах мар вырăнсенчен» таврăнсан та вăл тивĕçлĕ пĕтĕмлетÿсем туман, тÿрĕ çул çине тухма шутламан. Судпа айăпланине пăрахăçламалли вăхăт çитмесĕрех (не снятая судимость) Бильтяев каллех преступлени çулĕ çине тухнă.
2008 çулхи апрелĕн 27-мĕшĕнче вăл, хĕрĕнкĕскер, 14 сехет иртсен, ют пурлăха вăрлас тĕллевпе, Ирçе Тĕккинчи «Карла» хресченпе фермер хуçалăхĕн ангарĕ патне çитнĕ. Вăл йĕри-тавралла пăхса илнĕ те, çывăхра никам та çуккипе усă курса ангар алăкĕсен айĕнчен шала кĕрсе кайнă, унтан фляга, 19 метр пăхăр провод (1 сантиметр диаметрлă), 7 метр икĕ шăнăрлă пăхăр провод – вĕсен пĕтĕмĕшле сумми 2068 тенкĕпе танлашать – вăрласа тухнă. Çапла вара, вăл РФ УКĕн 158 статйин 2-мĕш пайĕн «б» пунктĕнче палăртнă преступлени тунă. Тепĕр 10-15 минутранах Бильтяев, фермера кураймасăр тăнăскер, сиен кÿрес тĕллевпе каллех ангара кĕрсе кайнă, Унта вăл ДТ-75М трактор тата тулă вăрлăхĕ çине сăрă сапнă, кĕсйинчен зажигалка кăларса тивертсе янă. Пушара пула 3 класлă 1 тонна тулă тата асăннă трактор юрăхсăра тухнă. Çак пурлăхсен пĕтĕмĕшле хакĕ 52 пин тенкĕ (!) тăрать. Ку преступлени (РФ УКĕн 167 статйин 2-мĕш пайĕпе никĕсленет) те уншăн пĕр пăтăрмахсăр иртессе шаннă пулĕ Бильтяев, вут хĕмĕ кайран хăйне те «ĕнтесси» пирки шутламан.
Районти суд йышăнăвĕпе килĕшÿллĕн, Бильтяевăн çирĕп режимлă колонире 3 çул таранах пулма тивет. Мĕнле калас, пулни-иртни пирки шутлама вăхăт çителĕклĕ халĕ унăн.