27 сентября 2008 г.
ТЕМИÇЕ çул каяллипе танлаштарсан, районти ялсен сăн-сăпачĕ нумай улшăнчĕ, илемленчĕ. Çынсен ăнланулăхĕ ÿссе пыни, тирпейлĕ пурăнсан хамăршăнах аван пулнине ăнланакансем нумайланни чунтан савăнтарать. Районта çулленех «Чи тирпейлĕ ял», «Чи илемлĕ урам», «Чи пуян килти хушма хуçалăх» конкурс ирттереççĕ, çĕнтерÿçĕсене халăх умĕнче чыслаççĕ. Çуркунне тата кĕркунне санитарипе экологи уйăхлăхĕсене ирттерни те тăван ял, тавралăх илемĕшĕн тăрăшниех.
Çапла, ырă ĕçсем – куç умĕнче, лайăххине пиртен никам та туртса илес çук. Анчах тăван ял, урам, çул хĕррипе çырма таврашĕ яланах тирпейлĕ пултăр тесе мĕн кирлине пурне те тăватпăр-и-ха; Шел те, çакна çирĕплетсе калама çукрах. Шăмăршăра та, ялсенче те тирпейсĕр урамсем, çÿп-çап тăкса тултарнă çырма-çатрасем, хыт-хура ашкăракан пахчасем пур.
Тĕрĕс, юлашки вăхăтра урамсенче çÿп-çап хумалли контейнерсем чылай вырнаçтарчĕç, ятарлă машина тасамарлăха свалкăна тиесе каять. Анчах тавралăха варалама хăнăхнă йăлана тĕппипех кăклаймарăмăр-ха. Саккунсăр свалкăсем çав-çавах пĕтмеççĕ, çакна район прокуратури ирттернĕ тĕрĕслÿ те çирĕплетет.
Район центрĕнче выльăхсем, уйрăмах качакасем ирĕккĕн çÿрени çинчен хаçатра пĕрре кăна çырман. Шел, выльăх хуçисен совеçĕ вăранаймарĕ-ха, качака кĕтĕвĕсем паян та урамри çамрăк йывăçсене кăшлаççĕ. Çакăн пек тĕслĕхе ытти ялсенче те курма пулать. Çынсем тирпей-илемшĕн тăрăшнине, чунтан хавхаланса ĕçленине сума суман этемккесене сура-сура ятланин те усси сахал. Хăçанччен килĕшсе пурăнăпăр çак йĕркесĕрлĕхпе;
Сентябрĕн 15-мĕшĕнчен пуçласа октябрĕн 15-мĕшĕччен районта санитарипе экологи уйăхлăхĕ пырать. Атьăр-ха хамăрăн яла, урама, йĕри-тавралăха тирпейлер, ишĕлекен çырма-çатра хĕррине йывăçсемпе тĕмсем лартар, карта тытса пÿлер. Çак ĕçсене укçасăрах, халăх вăйĕпех пурнăçлама пулать вĕт-ха. Ватти-вĕтти кар тăрса тухсан, ял поселенийĕсен администрацийĕсем вĕсене ертсе пырсан вун-вун ырă ĕç тума пулĕччĕ.