27 сентября 2008 г.
Кĕçех Республикăри патшалăх театрĕсен çĕнĕ сезон пуçланать. Республикăри театрсен пултарулăх ертÿçисемпе тĕп режиссерĕсем массăллă информаци хатĕрĕсенче ĕçлекенсемпе Чăваш наци музейĕн конференц-залĕнче пресс-конференци ирттерчĕç. Ăна Чăваш Республикин культура министрĕн пĕрремĕш çумĕ В.Бондарев ертсе пычĕ. Вăл 2007-2008 театр сезонĕн итогĕсемпе паллаштарчĕ. Иртнĕ сезонра театрсем 1500 спектакль лартнă. Сцена çине 28 çĕнĕ ĕçпе тухнă. Спектакльсене 300 пин ытла çын пырса курнă. М.Михайлов ячĕллĕ опера фестивалĕ иртнĕ, хăш-пĕр театрсем хăйсен юбилейĕсене паллă тунă.
2008-2009 çулсенчи театр сезонĕнче пултарулăх ĕçченĕсем мĕнле çĕнĕлĕхсемпе савăнтарĕç-ха; Çакăн çинчен театр режиссерĕсем каласа пачĕç.
– Иртнĕ сезонра чăвашсен пĕрремĕш театрĕ 90 çул тултарнине анлăн паллă турăмăр, – терĕ К. Иванов ячĕллĕ Чăваш патшалăх академи театрĕн пултарулăх ертÿçи Валерий Яковлев. – Анчах çакăнпа юбилей мероприятийĕсем вĕçленмен-ха. Юпа уйăхĕн малтанхи кунĕсенче Мускаври Таганка театрĕнче Ф.Павловăн «Ялта» драмине, А.Островскин «Шухă вырăнта», А.Чебановăн «Праски кинеми мăнукне авлантарать» камичĕсене лартса паратпăр. Мускав чăвашĕсем пирĕн спектакльсене хальхинче те хапăл туса йышăнасса шанатпăр.
Чăвашсен тĕп театрĕ чÿк уйăхĕнче Хусана çитсе килме те палăртнă. Çĕнĕ сезон вара республикăри театра юратакансемшĕн юпа уйăхĕн 16-мĕшĕнче уçăлать. Çак кун «Ялта» спектакльпе артистсем сцена çине тухаççĕ. В.Яковлев палăртнă тăрăх, театр репертуарĕнче çĕнĕ сезонра 19 спектакль пулать. Ачасем валли 5 спектакль-юмах хатĕрлеççĕ. Болгари драматургĕн Й.Йоваковăн «Албена» хайлавĕ тăрăх театрăн тĕп режиссерĕ В.Яковлев «Телейпе юнашар инкек» ятлă спектакле сцена çине кăларасшăн. Тепĕр çĕнĕ ĕç – «Туй пулать-и, туй пулмасть-и;» Пьеса авторĕ – Н.Угарин драматург. А.Павлов, Н.Корчаков режиссерсем, Г.Большаков артист (вăл та хăйне режиссер ĕçĕнче тĕрĕслесе пăхасшăн) çĕнĕ спектакльсем хатĕрлеççĕ.
Чăваш патшалăх оперăпа балет театрĕ хăйĕн 49-мĕш сезонне авăн уйăхĕн 24-мĕшĕнче «Спящая красавица» балетпа уçать. Çĕнĕ çулччен театр М.Михайлов ячĕллĕ опера тата Пĕтĕм тĕнчери балет фестивалĕсене ирттерет. Балет фестивалĕ юпа уйăхĕн 28-мĕшĕнче П.Чайковскин «Лебединое озеро» ĕçĕпе уçăлать. Фестивальте куракансем «Спартак» (Йошкар-Ола), «Жизель» спектакльсемпе паллашĕç. Опера фестивальне раштав уйăхĕн 10-14-мĕшĕсенче ирттерме палăртнă. Çак тата ытти çĕнĕ ĕçсем, театрти улшăнусем çинчен театрăн пултарулăх ертÿçи тата тĕп режиссерĕ Ольга Нестерова, Валерий Кокарев тĕп балетмейстер каласа пачĕç.
Çеçпĕл Мишши ячĕллĕ Чăваш патшалăх çамрăкĕсен театрĕн тĕп режиссерĕн Станислав Васильевăн коллектив ĕçĕ-хĕлне лайăхлатас енĕпе ĕмĕт-тĕллевсем пысăк. Вĕсем пирки вăл журналистсене хавхаланса каласа пачĕ. Çĕнĕ сезонта премьерăсем те, иртнĕ сезонсенчи спетакльсем те пулĕç. Унсăр пуçне театра юратакансем валли тĕрлĕ мероприятисем йĕркелеме палăртнă. Вĕсенчен хăшĕ-пĕрне çеç асăнар: çармăс çыравçин Зинаида Долгачеван «Тăм тивнĕ чечексем», Марина Карягинан «Кĕмĕл тумлă çар» пьесисем тăрăх лартнă спектакльсем. Театр ачасемпе çамрăксем валли вырăсла спектакльсем лартма та хатĕрленет.
Пресс-конференцире Чăваш патшалăх пукане театрĕн пултарулăх ертÿçи Юрий Филиппов, Вырăс патшалăх драма театрĕн тĕп режиссерĕ Ашот Васканян, Чăваш патшалăх сăнав театрĕн пултарулăх ертÿçи Валерий Проворов пултарулăх коллективĕсен çĕнĕ сезонри ĕçĕсемпе, тĕллевĕсемпе паллаштарчĕç.