08 октября 2008 г.
КĂÇАЛ та районти шкулсенче производство бригадисем ăнăçлă ĕçлерĕç. Çуллахи каникул вăхăтĕнче вĕсем шкулсен опытлă участокĕсенче пахча-çимĕçе çум курăкран тасатса тăчĕç, ял урамĕсене тирпей-илем кĕртес енĕпе тăрăшрĕç, вырăнти фермер тата ял хуçалăх предприятийĕсен хирĕсенче ĕçлерĕç. Палтиелĕнчи вăтам шкул бригади вырăнти лесничествăра вăй хунă. 11 шкулти 11 бригада йышĕнче пурĕ 300 ытла вĕренекен пулнă.
Нумаях пулмасть Васанти вăтам шкулта, çуллахи каникул кунĕсенче тунă ĕç-хĕле пĕтĕмлетсе, вĕренекенсен ĕç бригадисен фестивалĕ иртрĕ. Вăл выставкăпа уçăлчĕ. Çак куравра шкулсенчи ĕç бригадисен ĕç-хĕлне çутатакан альбомсем, стендсем, фотоиллюстрациллĕ стена хаçачĕсем, ачасем хăйсем çитĕнтернĕ пахча-çимĕçсем, ÿсентăранран хатĕрленĕ декоративлă прикладной искусство япалисем пулчĕç. Выставка ĕçне пĕтĕмлетсен Палтиел вăтам шкулĕнчи «Бригантина» бригада (бригадирĕ В. Габитова) – пĕрремĕш, Шăмăршă вăтам шкулĕнчи «Мы – Шемуршинцы!» бригада (О. Кудряшова) – иккĕмĕш, Васан вăтам шкулĕнчи «Орлята» бригада (Т. Полякова) виççĕмĕш вырăнсене йышăнни палăрчĕ.
Фестивале малалла тăсса, Шăмăршăри ачасемпе çамрăксен спорт шкулĕн тренер-преподавателĕсем ĕç бригадисен командисем хушшинче спартакиада йĕркелерĕç. Ăмăртусен кăтартăвĕсене пĕтĕмлетсен Карапай Шăмăршă вăтам шкулĕн команди пĕрремĕш вырăна тухрĕ. Шăмăршăпа Анат Чаткас вăтам шкулĕсен командисем иккĕмĕшпе виççĕмĕш пулчĕç.
Районти мероприяте вĕçлесе, малалла вара производство бригадисем хăйсен визиткисемпе («Ачасен чи лайăх ĕç бригади» районти конкурс положенийĕпе килĕшÿллĕн кăçалхи июнĕн 1-мĕшĕнчен пуçласа августăн 31-мĕшĕччен туса ирттернĕ ĕç-хĕлпе) паллаштарчĕç.
Жюри районти конкурс кăтартăвĕсене пĕтĕмлетсен Палтиелĕнчи «Бригантина» (руководителĕсем С.Р.Сандркинапа Э.К.Невметова) тата Шăмăршăри «Мы – Шемуршинцы!» (В.В.Хорькова) ĕç бригадисем пĕрремĕш вырăн çĕнсе илни курăнчĕ. Чукалти пĕтĕмĕшле пĕлÿ паракан тĕп шкулти «Дэльта» (Т.А.Чамеева) бригада – иккĕмĕш, Патирекри пĕтĕмĕшле пĕлÿ паракан тĕп шкулти «Энергия» (Г.Ш.Кафизова) тата Карапай Шăмăршăри вăтам шкулти «Ровесник» (Т.А.Степанова) бригадăсем виççĕмĕш вырăнсене пайларĕç.
1-3 вырăнсем йышăннă ĕç бригадисем райадминистрацин вĕрентÿ, çамрăксен политикин тата культура пайĕн Грамотисене тата призсене тивĕçрĕç.
«Бригантина» республикăри конкурсра та район чысне çÿлте тытнине, «Ачасен чи лайăх ĕç бригади – 2008» хисеплĕ ята çĕнсе илнине палăртма кăмăллă.