22 октября 2008 г.
Клавдия Ефремовна Ишукова (хĕр чухнехи хушамачĕ Федорова) Энтĕрьел ялĕнче çуралса ÿснĕ. 1954 çулхи февральте Виçпÿрт Шăмăршă каччипе, колхозра паллă тимĕрçĕпе Михаил Ишуковпа пĕрлешнĕ те, телейлĕ мăшăр виçĕ хĕрпе икĕ ывăл çуратса ÿстернĕ.
Клавдия Ефремовна мĕн ватăличченех ĕçрен уйрăлмах: вăрçă çулĕсенче колхоз валли Кучек патĕнче вăрман каснине, йывăçсене сулă туса шывпа юхтарнине, каярахпа сухăр юхтарнă çĕрте, стройкăра ĕçленине паян куççуль витĕр аса илет. Выçăллă-тутăллă, хĕн-асаплă çулсем манăçмаççĕ çав.
Тăван колхозра чунтан тăрăшса вăй хунăшăн К.Е.Ишукована Хисеп грамотисемпе тата «Ĕç ветеранĕ» медальпе чысланă.
Клавдия Ефремовнан аслă ывăлĕ – Раççей çарĕн запасри подполковникĕ. Иккĕмĕш ывăлĕ те çар çыннин профессине суйласа илнĕ. Хĕрĕсем вара педагогăн пархатарлă ĕçне килĕштернĕ. Хăйĕн ачисемпе Клавдия Ефремовна тивĕçлипе мухтанма пултарать.
Çак кунсенче К.Е.Ишукова 80 çул тултарать. Çирĕп сывлăх, вăрăм ĕмĕр сунаççĕ ăна çывăх çыннисемпе тăван ял-йыш.