25 октября 2008 г.
ЧĂВАШ Республикинчи çамрăк космонавтсен отрячĕсем çак кунсенче Королев хулинче пулса курнă. Шăмăршă вăтам шкулĕнчи «Альтаир» отрядри А.Мульдияров, Р.Бахитов, Е.Ларионова, Л.Хайруллина та çак чыса тивĕçнĕ. Вĕсен тĕллевĕ вĕçевсен управлени центрĕнче «Союз ТМА-13» космос карапне тĕнче уçлăхне вĕçтернине сăнасси пулнă. Çавăн пекех вĕсем «Энерги тата унăн музейĕ» РККна çитнĕ. Унта ачасем Çĕр чăмăрĕн пĕрремĕш искусствăллă спутникне тата ытти тĕлĕнтермĕшсене те курнă. Тĕнче уçлăхне Лайка ятлă йытă вĕçнĕ космос карапне, Ю.А.Гагарин вĕçнĕ «Восток» карапĕн макетне курни те нумайлăха асра юлĕ. Экспонатсем хушшинче «Мир» орбитăпа космос станцийĕн макечĕ чи пысăкки пулнă.
Çамрăк космонавтсен отрячĕ тĕнче уçлăхне космос карапне вĕçтернине, унта ĕçлекен специалистсен ĕçĕ-хĕлне хăйсен куçĕсемпе курса ĕненнĕ. Çăлтăр хулине çитсе космонавтсем хатĕрлекен центрпа паллашнă.
Çул çÿрев ачасене питĕ килĕшнĕ. Вĕсемшĕн экскурси нумайлăха асра юлĕ. Çамрăк космонавтсен отрячĕн членĕсене Королев хулине Чăваш Республикин вĕрентÿпе çамрăксен политикин министерстви илсе кайнă. Ачасемпе пĕрле çул çÿревре пирĕн ентеш, Раççей Геройĕ Н.Бударин летчик-космонавт пулнă.