29 октября 2008 г.
ПАЯНХИ кăткăс пурнăçра та пуçа усманнисене, йывăрлăхсене çĕнтерсе пырассишĕн пĕтĕм вăй-хала хуракансене мухтамасăр чун чăтмасть.
«Потребительсен рынокне таварсемпе тата пулăшу ĕçĕсемпе тултарма пулăшакан, çĕнĕ ĕç вырăнĕсем тăвакан, харпăрлăхçăсен пысăк йышне йĕркелекен пĕлтерĕшлĕ çул-йĕртен пĕри пĕчĕк тата вăтам бизнеса аталантарни шутланать», - тенĕ Чăваш Республикин Президенчĕ Н.В.Федоров Патшалăх Канашне янă Çырура. Район пуçлăхĕ В.П.Фадеев та пĕчĕк предпринимательствăна аталантарни район экономикине тĕреклетмелли, халăха ĕç вырăнĕсемпе тивĕçтермелли тĕп çулсенчен пĕри тесе шутлать, пĕчĕк предприяти йĕркелессишĕн пуçарулăх кăтартакан çынсене пур енлĕн пулăшма тăрăшать.
Акă, Шăмăршăри пекарньăна хупнăранпа, унти мĕнпур оборудование салатса пĕтернĕренпе, каярахпа вара çак шăпа Пăчăрлă Пашьелĕнчи пекарьнăна та пырса çапнăранпа район çыннисем ютран турттарса килнĕ çăкăра туянса пурăнчĕç. Паллах, çакă района чыс кÿмест, тата ютран илсе килнĕ çăкăрăн пахалăхĕ те кăмăла кайсах пĕтмест. Кун пирки район хаçачĕ пĕрре кăна мар çырнăччĕ.
Халĕ тинех пăр тапранчĕ теме пулать: Асанкассинче çуралса ÿснĕ маттур чăваш, тахçантанпах ĕнтĕ Шăмăршăра тĕпленсе пурăнакан Леонид Корчаков предприниматель район çыннисене Шăмăршă çăкăрне çитерме тĕллев лартнă. Унчченхи райпон пахча-çимĕç продукчĕсем хатĕрлекен цехăн çуртне туянса, тĕпрен юсаса-илемлетсе, кирлĕ оборудовани вырнаçтарса пекарня уçнă.
Пекарня талăкра 1 пин буханка таран çăкăр пĕçерме пултарать. Çăнăхне хăйсен арманĕнчех авăртаççĕ. Евгений Русский мельник каланă тăрăх, çăнăх пахалăхĕ питĕ лайăх, çакна ăна туянакансем йышлă пулни те çирĕплетет.
Тутлă та кăпăшка çăкăр пиçесси Инна Корчакова технологран та нумай килет. Вăл Чăваш ял хуçалăх академийĕнче юлашки курсра вĕренет, ашшĕ йĕркеленĕ пĕчĕк предприятие малалла аталантармалли бизнес-план туса хатĕрленĕ. Пекарньăра хальлĕхе икĕ тĕрлĕ çăкăр пĕçереççĕ пулсан, малашне кондитер изделийĕсем те хатĕрлесшĕн. Çывăх вăхăтрах аш-какайпа пулă тĕтĕмлекен цех та уçăлмалла.
Мана çăкăр хакĕ интереслентерчĕ. «Район центрĕнчи лавккасене буханкине 10 тенкĕпе тăрататпăр, - терĕ Леонид Васильевич. – Паллах, предпринимательсем суту-илÿ хакне хушаççĕ ĕнтĕ. Хамăр патăра килсе туянакансене вара пĕр буханкине 10 тенкĕпех, хуть те мĕн чухлĕ те сутатпăр».
Хальлĕхе пĕчĕк предприятире 10 çын ĕçлет, производствăна анлăлатнă май коллектив пысăклансах пырĕ.
Иртнĕ эрне кун пекарньăна савăнăçлă лару-тăрура уçрĕç, унта район пуçлăхĕн пĕрремĕш çумĕ В.Н.Никифоров хутшăнчĕ. Владимир Николаевич, кăмакаран тин пиçсе тухнă çăкăр пахалăхне ырланă май, Корчаковсене ăнăçу сунса çапла каларĕ:
– Ĕлĕкрех Карапай Шăмăршă пекарнинче пĕçерекен çăкăра Шупашкарсем те туянатчĕç, çак çăкăрпа чаплă хăнасене чыслаттăмăр. Сирĕн предприятийĕр те район çыннисене яланах тутлă та сĕтеклĕ çăкăрпа савăнтартăр.