08 ноября 2008 г.
НОЯБРĔН 1-мĕшĕнче Шăмăршăри Культура керменĕнче Тутар культурин кунне халалласа районти фестиваль иртрĕ. Вăл Комсомольски районĕнчи пултарулăх ушкăнĕн «Аулак» («Улах») вокалпа хореографи композицийĕпе уçăлчĕ. Кун хыççăн Тутар культурин уявне килнисене, художество пултарулăх ушкăнĕсене саламласа Шăмăршă районĕн пуçлăхĕ В.П.Фадеев, Чăваш Республикинчи мăсăльмансен Духовнăй управленийĕн Газийĕ Сеетзада хазрат Гимаев, Чăваш Республикинчи тутарсен наципе культура автономийĕн председателĕ, Комсомольскинчи ача-пăча искусство шкулĕн директорĕ Ф.А.Гибатдинов, Тутарстан Республикинчи Çĕпрел районĕн администрацийĕн пуçлăхĕн çумĕ А.Ф.Залялов ăшă сăмахсем каларĕç.
Фестиваль концерчĕн программи Шăмăршăри кăтартуллă «Фламинго» ташă ансамблĕн «Я, ты, он, она» ташă композицийĕпе пуçланчĕ. Патирекри И. Хамдеев хитрен шăрантарнă «Хаерле юл» («Ырă çул») юрра та кăмăллăн йышăнчĕ тулли зал.
Комсомольскипе Шăмăршă районĕсен, Тутарстанри Çĕпрел районĕн пултарулăх коллективĕсемпе уйрăм солистсем, тутарсен хитре кĕпе-тумтирне тăхăннăскерсем, пĕр-пĕринпе черетленсе сцена çине тухса, халăха тутарсен илемлĕ художество номерĕсемпе савăнтарчĕç. Хамăр районти «Созвездие» ташă коллективĕ (Палтиелĕнчи вăтам шкул), кăтартуллă «Фламинго» ташă ансамблĕ тутарсен хÿхĕм ташшисемпе, Патирекри тĕп шкулта вĕренекенсен ушкăнĕ, С. Невметовапа (Палтиел) Э. Шарипова (Патирек) солисткăсем çепĕç юрăсемпе килентерчĕç.
Комсомольски районĕнчи «Мишар» ансамблĕн хореографи ушкăнĕн ташшисене, «Урмай егетлере» («Урмай йĕкĕчĕсем) вокал, тата «Мишар» эстрада ансамблĕсен, Ф. Садртдинов, Л. Шарапова, Г. Шарипова солистсен юррисене те куракансем питĕ килĕштерчĕç. Çĕпрел районĕнчи халăх инструменчĕсен ача-пăча ансамблĕ тутарсен чуна тивекен кĕввисемпе, халăх юрăпа ташă коллективĕ, Г.Ракиповапа Р.Низамов солистсем лирикăллă тата эстрада юррисемпе паллаштарчĕç.
Фестиваль концерчĕн программине Палтиел вăтам шкулĕн учительници Э.Невметова пултаруллăн ертсе пычĕ.
Уява килнисем фойере Палтиелĕнчи, Патирекри, Асанкассинчи тата Анат Чаткасри тутарсен хитре тĕррисене, алăсталăх япалисене тата кĕпи-тумтирĕн выставкисене те курса çаврăнчĕç.
Мероприяти вĕçленсен район пуçлăхĕ В.П.Фадеев, райадминистрацин вĕрентÿ, çамрăксен политикин тата культура пайĕн начальникĕ Н.Г.Игнатьева районсенчи художество коллективĕсемпе солистсене тулли содержаниллĕ концертшăн тав турĕç, вĕсене Грамотăсемпе, фестиваль лауреачĕн Дипломĕсемпе, парнесемпе чысларĕç.