15 ноября 2008 г.
ВАСАНТИ вăтам шкулта В.Н.Никифоров генерал-майор çуралнăранпа 85 çул çитнине халалласа тематика каçĕ иртрĕ. Унта ачасем Шăмăршăра çуралса ÿснĕ çар начальникĕн ачалăхĕпе, служба ĕçĕ-хĕлĕпе, фронтри паттăрлăхĕпе паллашрĕç. Вĕренекенсем ыйтусем те нумай пачĕç.
Кадетсен класĕнче генерала халалласа стена хаçачĕ те кăларнă. Саккăрмĕшсемшĕн В.Н.Никифоров уйрăмах пысăк хисепре. Кадетсем Тăван çĕршывшăн усăллă çынсем пулса ÿсме тăрăшаççĕ, унăн шанчăклă хÿтилевçисен ретне тăма хатĕрленеççĕ. Вăтам шкул пĕтерсен çар институтне е аслă училищине вĕренме кĕме ĕмĕтленекен яшсем те пур.
В.Н.Никифоров генерал-майор Томскри аслă çыхăну çар училищин начальникĕ пулнă çулсенче тата кайранхи тапхăрта Васанти вăтам шкултан вĕренсе тухнă выпускниксем асăннă вĕренÿ заведенисене вĕренме кĕнĕ, офицер званийĕ илсе Тăван çĕршыва хÿтĕлекен çар подразделенийĕсен командирĕсем е çыхăну инженерĕсем пулса тăнă тĕслĕхсем нумай. Вĕсем хушшинче – Вячеславпа Владимир Урмаевсем, Владимирпа Валерий Морозовсем, Владислав Концов, Алексей Петров, Андрей Горшковпа Николай Миронов. Вячеслав Урмаев полковник Андрей Горшковпа Николай Миронов майорсем халĕ те Раççей çарĕнче службăра тăраççĕ-ха, ыттисем – запасри офицерсем.