15 ноября 2008 г.
«ЕДИНАЯ РОССИЯ» партин Чăваш Енри уйрăмĕн йышăнăвĕпе килĕшÿллĕн, партин Шăмăршă районĕнчи вырăнти уйрăмĕ 2008 çул пуçламăшĕнче медицинăпа сиплев учрежденийĕсен библиотекисем валли халăхран кĕнекесем пухас ĕçе йĕркелесе янăччĕ. Çак акцие хутшăнса, «Единая Россия» партин вырăнти уйрăмĕн членĕсемпе ун майлисем тата районти депутатсен Пухăвĕнчи «Единая Россия» фракцийĕн депутачĕсем медицина учрежденийĕсем валли илемлĕ литература кĕнекисене пухас ĕçе хастар хутшăнчĕç. Вĕсем тăрăшнипе, кĕске хушăрах партин вырăнти уйрăмĕн обществăлла йышăну пÿлĕмне 150 яхăн кĕнеке килсе пачĕç. Парти чĕнĕвне ырласа партин Шăмăршăри тĕп тата Лесхозная, Анат Чаткас, Кивĕ Чукал, Карапай Шăмăршă, Васан ялĕсенчи пуçламăш организацийĕсем уйрăмах пысăк пуçарулăхпа активлăх кăтартнине палăртма кăмăллă.
Уйрăм çынсенчен Шăмăршăра пурăнакан Геннадий Андроновпа Леонид Еливанов пенсионерсем, Чăваш Республикин Патшалăх Канашĕн депутачĕ Александр Максимов тата партин ытти членĕсемпе парти майлисем вуншар кĕнеке парнелерĕç.
Çак кунсенче «Единая Россия» партин вырăнти уйрăмĕн ĕçтăвком ертÿçи Петр Фомин пухăннă кĕнекесен пĕр пайне – 65 кĕнекене – районти тĕп больница библиотекине, тепĕр 60 кĕнекене райцентрти ваттисен çуртне пачĕ.
Райбольницăра сипленекенсемпе ваттисен çуртĕнче пурăнакансем «Единая Россия» парти парнине кăмăллăн кĕтсе илчĕç тата чĕререн тав турĕç.