03 декабря 2008 г.
ЧĂВАШ Республикин Министрсен Кабинечĕн 2008 çулхи майăн 21-мĕшĕнчи 142-мĕш номерлĕ Постановленийĕпе килĕшÿллĕн, кăçал инвалидсене тата инвалид-ачаллă çемьесене социаллă пулăшу парасси ÿснĕ. Халĕ патшалăх вĕсене коммуналлă çăмăллăхсемшĕн саплаштаракан суммăна 98 процент таранах пысăклатнă (инвалидсен тата инвалид-ачаллă çемьесен 2 процентне кăна тÿлемелле). Ку паллах, вĕсемшĕн сисĕмлĕ пулăшу.
2005 çулхи январĕн 1-мĕшĕччен çăмăл автомашина илме черете тăнă вăрçă инваличĕсенчен 3-шне кăçал Çĕнтерÿ кунĕ тĕлне 7-мĕш модельлĕ «Жигулипе» тивĕçтернĕ. Вăрçă инваличĕсенчен 5-шĕ вара ун вырăнне укçа компенсацийĕ илме кăмăл турĕ. Çак компенсацисене пĕтĕмпех тÿлесе татнă. Çавăн пекех вăрçăн пĕр инвалидне çĕнĕ хваттер туянма 550 пин тенкĕлĕх сертификат панă. Пире телейлĕ тăвассишĕн фронтра паттăррăн çапăçнă ватă салтаксене патшалăх пысăк тимлĕх уйăрни, паллах, питĕ вырăнлă.
Чăваш Республикин Министрсен Кабинечĕн кăçалхи апрельти Постановленине тĕпе хурса сахал пенси илекен 17 инвалида çак кунсенче укçа-тенкĕ парса пулăшнă.
Пĕтĕм тĕнчери инвалидсен кунĕ умĕн, ноябрĕн 27-28-мĕшĕсенче, Çĕнĕ Шупашкар хулинче инвалидсем хушшинче тĕрлĕ спорт ăмăртăвĕсем иртрĕç. Спорт фестивальне пирĕн районти инвалидсен тата ачаран инвалид пулса ÿсекенсен командисем те хутшăнчĕç, лайăх результатсемпе палăрчĕç.
Декабрĕн 3-мĕшĕнче Шăмăршăри Культура керменĕнче те районти инвалидсем хушшинче спортăн тĕрлĕ ăмăртăвĕсене йĕркелетпĕр. Культура ĕçченĕсем вĕсене концертпа та савăнтараççĕ. Ыран вара инвалид-ачасен пĕр ушкăнĕ Шупашкарти пуканесен театрне юмах-спектакль курма тухса каять.