06 декабря 2008 г.
ШĂМĂРШĂРА çуралса ÿснĕ, ахаль салтакран генерал-майора çитнĕ В.Н.Никифорова халалласа район историйĕн музейĕнче йĕркеленĕ мероприятире Шăмăршăри вăтам шкулти аслă классенче вĕренекенсем пулчĕç. Райцентрти тĕп библиотека ĕçченĕсем вĕсене малтанах «Генерал из Шемурши» стендпа, мухтавлă ентешĕмĕрĕн çар наградисен докуменчĕсемпе, унăн ылтăн тĕспе çиçекен пакунсемлĕ парад формипе (ăна Василий Николаевич 2001 çулта, çуралнă кĕтесе хăнана килсен парнелесе хăварнă) паллаштарчĕç. Кун хыççăн В.Н.Никифоровăн ашшĕпе амăшĕ, ĕçре пиçĕхнĕ ачалăхĕпе çамрăклăхĕ, службăн малтанхи çулĕсем, офицерăн Аслă Отечественнăй вăрçă вăхăтĕнчи паттăрлăхĕ, вăрçă хыççăнхи тата каярах тапхăрти служби çинчен каласа пачĕç.
Отставкăри генерал-майор, 6 орден кавалерĕ В.Н.Никифоров Санкт-Петербургра пурăнать. Тăван Шăмăршă пирки те манмасть паллă ентешĕмĕр. Кăçалхи август уйăхĕнче Василий Николаевич çуралнă кĕтесе килсе тăванĕсемпе, район администрацийĕн тата Шăмăршă ял поселенийĕн руководителĕсемпе, специалистсемпе тĕл пулса калаçнă. Тăванĕсемпе пĕрле В.Н.Никифоров райцентрти урамсене курса çÿренĕ. Евростандарта тата строительствăн чи çĕнĕ технологийĕсене пăхăнса тунă илемлĕ çуртсем ватă генерала чунтанах савăнтарнă, çĕнĕ кăмăл-туйăмпа хавхалантарнă.