06 декабря 2008 г.
ВИÇПŸРТ ШĂМĂРШĂРА çуралса ÿснĕ Н.Арьяхова çитĕнсе çитсен те тăван вырăнтан уйрăлман: кунтах çемьеллĕ, ача-пăчаллă пулнă. Унтанпа сахал мар шыв юхнă, çил вĕрнĕ – хул пуççи çине тиенекен çулсен хисепĕ те ÿссех пырать.
Вăтăр çулпа танлашать Нина Васильевнан ĕç стажĕ, вĕсенчи кашни кун тенĕ пекех выльăх-чĕрлĕхпе çыхăннă.
Унăн ĕç кĕнекинче пĕрремĕш йĕркесем çакнашкал: 1980 çулта «Правда» колхозăн Пуянкассинчи сĕт-çу фермине лаборантка пулса ĕçлеме илнĕ. Ун хыççăн осеменатор та, доярка та пулнă вăл, хăйĕн тивĕçне яланах пысăк яваплăхпа пурнăçланă.
Кирек мĕнле ĕçре те пĕлÿ кирлĕ – куçа хупса, алăран ĕç кайтăр тесе çеç ĕçлейместĕн вĕт. Н.Арьяхова та 1986 çулта Вăрнарти совхоз-техникумран ăнăçлă вĕренсе тухса алла диплом илнĕ. Çакăн хыççăн ăна ферма заведющийĕ пулма çирĕплетнĕ. Ку лава унăн сакăр çул туртма тивнĕ. Çак çулсенче хуçалăх сĕт суса илес тĕлĕшпе районта чи лайăххисен шутĕнчеччĕ. Нина Васильевна та ĕçри хастарлăхшăн Хисеп грамотисемпе хаклă парнесене сахал мар тивĕçнĕ: ку – чапшăн çунни мар, кунне-çĕрне пĕлмесĕр ĕçлени.
Халĕ те юратнă ĕçрен – фермăран – уйрăлма шутламасть вăл. Паянхи кун вăл «Агрофирма «Карлинская» ЗАОра вăй хурать, сыснасем пăхать. 34 сысна ун ушкăнĕнче. Вĕсене юратса пăхнипе ĕç тухăçлăхĕ те пысăк: кăçал кăна хастар ĕçчен кашни тĕп амаран çирĕмшер пуçа яхăн çура илме пултарнă. Ку кăтарту – районта чи лайăххи. Ахальтен мар ĕнтĕ кăçал, Ял хуçалăх ĕçченĕсен уявĕнче, ăна «Районти чи лайăх свинарка» хисеплĕ ят парса чысларĕç. Вăл, хальхи вăхăтра хĕрĕхе яхăн сысна пăхаканскер, çак чыса чăннипех тивĕçлĕ.