20 декабря 2008 г.
ПАТИРЕКСЕМПЕ палтиелсем те, çывăхри ытти ялсенче пурăнакансем те сысна çурисене Севрюгинсенчен туянма тăрăшаççĕ. Шултра шурă ăратлă 8 ама усраççĕ Севрюгинсем. Кăçал вĕсене çăвăрлаттарса 150 çура сутнă. Пиншер тенкĕпе шутласан та (çу кунĕсенче пысăкрах хакпа та кайнă), 150 пин тенкĕ укçа ĕçлесе тунă. Сысна çурисемсĕр пуçне, 4 тоннăна яхăн какай сутнă.
Радик Петрович – профессийĕпе агроном, хăй каланă пек, «çĕр ачи». Зоотехникпа ветеринар ĕçĕсене те аван чухлать вăл, пĕлменнине тĕрлĕ литературăра шыраса тупать е Интернетра «ухтарать».
Сыснасемсĕр пуçне, икĕ пуç ĕне те усраççĕ Севрюгинсем, хăйсенчен ытлашши сĕте сутса укçа тăваççĕ. Пыл хурчĕсем ĕрчетни те çемье бюджетне пуянлатать.
Патирекре фермер юхăмĕ питех аталанайман-ха, çавăнпа та Радик Севрюгина «малтанхи чĕкеç» теме те пулать. 21 гектара яхăн çĕр çинче çĕр улми, пахча çимĕç, утăлăх курăк çитĕнтерет. Кăçал 50 тонна çĕр улми, 25 тонна хĕрлĕ чĕкĕнтĕр сутнă. Ытларах Саратов облаçĕнчи предпринимательсемпе çыхăну тытаççĕ.
Уй-хир ĕçĕсене çывăх юлташĕпе – Игорь Федотовпа пĕрле пурнăçлаççĕ. Иккĕшĕ те тĕрлĕ техникăпа ĕçлеме пĕлеççĕ, çĕмĕрĕлсен юсама та пултараççĕ. Çĕнĕ трактор тата кăкарса ĕçлемелли техника туянас ĕмĕтпе пурăнаççĕ. Пысăк тухăç паракан вăрлăхсем те илесшĕн. Паянхи пурнăçра яланах мал ĕмĕтлĕ пулмалла, «Кризис, кризис» тесе нăйкăшакансене Радик Петрович Севрюгин юратмасть. Ĕçлемесĕр, ним тумасăр ларсан чипер пурнăçрах панкрута тухма пулать, выльăх усрасан, çĕр çинче тар тăксан нихăçан та укçасăр лармĕ ял çынни.
Патирекри Севрюгинсем пек хастар çынсем районти кашни ялтах пур. Акă, Васанти А.Еремеев çемйи 4 вăкăрпа 12 сысна, В.Поляков çемйи 3 вăкăрпа 4 сысна, Кивĕ Шăмăршăри Н.Никитин çемйи 16 сысна, Ярăславри В.Романов çемйи 2 ĕне, 3 вăкăр тата 6 сысна усраççĕ.
Шел, ĕçчен çынсене асăрхама, тивĕçлипе хавхалантарма пĕлместпĕр, вĕсем пирки хаçатра та сахалрах çыратпăр. Çитес çула Н.В.Федоров Президент Çĕр ĕçченĕн çулĕ пулĕ тесе каларĕ, апла-тăк ял çынни паянхи кун геройĕ пулмалла. Эпĕ хамăр районта хăй вăхăтĕнче чаплă председатель, чăн-чăн çĕр çынни пулнă В.П.Кошкин ячĕллĕ преми туса хума, ăна çулталăк кăтартăвĕсем тăрăх чи ĕçчен хресчен (фермер) хуçалăхне пама сĕнесшĕн. Çак ырă ĕç валли укçа-тенкĕ тупма пулатех пулĕ. Ман сĕнÿ пирки район Пухăвĕн депутачĕсем мĕн калĕç-ши;