20 декабря 2008 г.
Шăмăршă район пуçлăхĕ Валерий ФАДЕЕВ:
– Ĕçлекен çын мĕн пур йывăрлăха çĕнтерĕ. Президент калашле, кризис лару-тăрăвĕнче те аталанăва вăй пама пултаракан самантсене тупма пулать. Çĕр ĕçченĕн çулталăкĕнче ял хуçалăх продукцийĕ тĕнчипех кирлĕ пултăр. Пирĕн ăна шалти тата тулашри рынокра сутма пахалăх енĕпе лайăх хатĕрлемелле. Çĕр ĕç культури, ял çыннисен культури тĕлĕшпе тимлĕ пулмалла.
Шăмăршăри Культура керменĕн директорĕ Владимир ПАВЛОВ:
– Президент Çырăвĕ Николай Васильевич Федоров культурăпа вĕрентÿ ыйтăвĕсем тĕлĕшпе питĕ тимлĕ пулнипе килĕшрĕ. Çын çăкăрпа кăна тутă пулманни паллă. Çакă мана хавхалантарать, савăнтарать. Ăс-хакăлпа чунлăх – çын пур енĕпе те килĕшÿллĕ пулни. Президент пурне те шăпах ку тĕлĕшпе тимлĕ пулма сĕнчĕ, çакă çын хăйне мĕнле туяссине никĕслет.