20 декабря 2008 г.
ЭЛКТРОЭНЕРГИ пирĕн пурнăçра паллă вырăн йышăнать. Вăл пирĕн пÿлĕмсене çутатать, кил-çуртри тĕрлĕ электроприборсене, электроника аппарачĕсене ĕçлеттерет. Предприяти-организацин производство хăвачĕ те – электроэнергире. Кĕскен каласан, электроэнергисĕр эпир пĕр кун та пурăнаймастпăр.
Çак кунсенче, энергетиксен професси уявĕ умĕн, пирĕн корреспондент Шăмăршă районĕн электричество сечĕн начальникĕпе А.В.ДЕНИСОВПА тĕл пулса калаçнă, ăна хăш-пĕр ыйтусем çине хуравлама ыйтнă.
– Пирĕн подразделенире пурĕ 23 çын ĕçлет, - терĕ Александр Витальевич. – Районти ялсене, предприятисемпе организацисене, учрежденисене электроэнергипе пĕр тикĕс тивĕçтересси пирĕн тĕп тĕллев пулса тăрать. Район территорийĕнчи электролинисемпе трансформатор подстанцийĕсем яланах кăлтăксемсĕр ĕçлеччĕр тесе, вĕсене тимлĕхре тытатпăр, час-часах пăхса-тĕрĕслесе тухатпăр.
– Хĕллехи çил-тăманлă çанталăкра е çуллахи çил-тăвăллă çумăр вăхăтĕнче кĕтмен технологи пăтăрмахĕ те пулать...
– Вăл е ку участокра инкек сиксе тухсанах – кăнтăрла-и, çĕрле-и – автомашина çине ларса çула тухатпăр. Сăмахран, хĕллехи тапхăрта автомашинăна çул хĕррине лартса хăваратпăр та, инкек тухнă вырăна йĕлтĕрпе каятпăр. Çил-тăманлă çанталăкра ĕçленĕ вăхăтра алă-ура шăнать, пите тăм илсе кайни те пулать. Анчах мĕнле йывăр пулсан та, бригада пăтăрмаха пĕтеричченех чăтăмлăн ĕçлет, никам та нăйкăшмасть. Автомашина çине ларса каялла базăна таврăннă чухне каялла çаврăнса пăхатăп та, ялта каллех фонарь çутисене курсан чун савăнать. Кĕрхи-çурхи йĕпе-сапара е çуллахи çумăрсем вăхăтĕнче те технологи пăтăрмахĕсем пулкалаççĕ. Кĕпе-тумтир çип юлмиччен йĕпенсен те, вĕсене кĕске вăхăтра пĕтерме тăрăшатпăр.
Подразделенире талăкĕпех дежурство йĕркеленĕ. Оперативлă бригада хуть-хăçан та çула тухма хатĕр.
– Электроэнергетика системинчи ĕç-хĕле те çуллен çĕнĕ технологисем кĕрсе пыраççĕ. Çавна май электромонтерсем, инженерпа техниксен йышĕнчи работниксем хăйсен пĕлĕвне ÿстерсех пыраççĕ пулĕ;
– Паллах. Пирĕн работниксенчен кашниех, графикпа килĕшÿллĕн, çуллен Шупашкарти е Канашри вĕрентÿ комбиначĕсенчи курссенче пулать, хăйĕн квалификаци пĕлĕвне ÿстерет. Тивĕçлĕ экзаменсем панă хыççăн вĕсем удостоверени илеççĕ.
– Професси уявĕ умĕн чылай çул тÿрĕ кăмăлпа ĕçлекенсене ятран асăнаймăр-ши;
– Пирĕн коллективра кашниех хăйĕн тивĕçне кирлĕ пек пурнăçласа пыма тăрăшать. Çавна май пĕрне мухтас, теприне хурлас килмест. Район территорийĕнче электроэнергипе тивĕçтересси пĕр тикĕс пытăр тесе пурте çине тăрса ĕçлетпĕр.
Районти электроэнергетика системинчи мĕн пур работниксене çывхарса пыракан Энергетик кунĕ ячĕпе ăшшăн саламлатăп, çирĕп сывлăхпа тулли телей, йывăр та пархатарлă ĕçре малашне те чăтăмлăн ĕçлесе пыма ăнăçу сунатăп.