30 декабря 2008 г.
ШĂМĂРШĂРИ Культура керменĕнче çамрăксен командисем хушшинчи КВН вăййисен районти финалĕ иртрĕ. «Утсам ыркăмăллăх çулĕпе» ятпа йĕркеленĕ çак конкурсра Палтиел, Кивĕ Чукал, Васан, Карапай Шăмăршă шкулĕсен, районти тĕп больница, Шăмăршă шкулĕн педагогĕсен тата Анат Чаткас ял поселенийĕн командисем ăмăртрĕç. Вĕсен программинче «Ырă ĕçсем тума пире пурнăç панă» визитка тата «Утсам ыркăмăллăх çулĕпе» килти задани пулчĕç.
Кăçалхи конкурса районти ялсенчен йышлăн килсе çитрĕç. Тулли зал командăсене «Маттур!» тесе тата хыттăн алă çупса хавхалантарса пычĕ.
КВН вăййисенче уйрăмах Шăмăршă шкулĕн учителĕсемпе («Шăмăршăри ассем – ветерансем» команда) Кивĕ Чукал çамрăкĕсем («Адреналин») палăрчĕç. Вĕсен çивĕч шÿчĕсем, сцена ăсталăхĕпе пултарулăхĕ тулли зала тÿрех тыткăнларĕ. Ахальтен мар ĕнтĕ жюри çак икĕ командăна пĕрремĕш вырăн парса хисеплерĕ. «Бэта» (Палтиел вăтам шкулĕ) команда – иккĕмĕш, «Васкавлă пулăшу» (районти тĕп больница) виççĕмĕш вырăнсене йышăнчĕç. Командăсен членĕсем райадминистрацин вĕрентÿ, çамрăксен политики тата культура пайĕн Дипломĕсемпе призĕсене илчĕç.
Жюри çавăн пекех çулленех вăйăсенчи чи пултаруллă çамрăка уйрăммăн палăртать. Çак хисепе «Адреналин» командăри Ольга Крикина тивĕçрĕ.