13 января 2009 г.
Ю.А.СТАРШОВ, «Исток» ОООО генеральнăй директорĕ:
– Чăваш Республикин Президенчĕ Çырура çĕнсе илнĕ чикĕсенчен чакма юраманнине палăртрĕ. Ырлатăп. Николай Васильевич умри тĕллевсене пурнăçламалли çул-йĕре тарăннăн, пурте ăнланмалла куç умне кăларчĕ: кашни отрасльтех тата пуçаруллăрах, лайăхрах ĕçлесен эпир йывăрлăхсене çĕнтерме пултарăпăр.
Е.М.СЕТРИВАНОВ, Шăмăршăра пурăнакан ĕç ветеранĕ:
– Президент Çырура табак туртнипе, эрехпе иртĕхнипе, çулсем çинчи йĕркесĕрлĕхпе кĕрешесси çинчен те витĕмлĕ, тĕслĕхлĕ каласа хăварчĕ. Чăн та, ырă мар пулăмсене пула çынсем нумай вилеççĕ. Çуран çÿрекенсемпе водительсен культурине те ÿстермелле пирĕн.
В.А.ЛЬВОВА, Шăмăршăри тĕп библиотека директорĕ:
– Президент Патшалăх Канашне янă Çыру пире чăнипех те хавхалантарчĕ. Уйрăмах культурăпа çыхăннă самантсем. Маншăн, сăмахран, асăннă Çыру малашне тата вăйлăрах, тухăçлăрах ĕçлеме хистекен пĕлтерĕшлĕ документ.