17 января 2009 г.
ПУЯНКАССИНЧИ пĕтĕмĕшле пĕлÿ паракан тĕп шкулта кăçал хĕллехи каникул вăхăтĕнче те сывлăха çирĕплетмелли «Çил çунат» лагерь ĕçлерĕ. Унта вун пилĕк ача çÿрерĕ. Пилĕк куна тăсăлнă сменăра шкул ачисем тĕрлĕ спорт мероприятийĕсенче тупăшса, ирсерен зарядка туса, тутлă апат-çимĕçпе апатланса сывлăхĕсене çирĕплетнипе пĕрлех тавра курăмне анлăлатрĕç, тĕрлĕ викторинăна, сĕтелçи вăййисене хутшăнчĕç, кроссворд-ребус тупсăмĕсене пĕлчĕç. Хĕр ачасемпе арçын ачасен пултарулăх шайне ÿстерес тĕллевпе концерт та йĕркелерĕмĕр. Унта чи хастаррисем юрласа та, ташласа та кăтартрĕç.
Ачасен лидер туйăмĕсене палăртас шутпа отрядăн хăй тытăмлăх органне суйларăмăр. Ушкăнăн пултарулăх кĕтесне ачасем хаваспах хатĕрлерĕç. Çавра сĕтелсем, калаçусем йĕркелесси, унта ачасене хутшăнтарассии йăла кĕнĕ ĕнтĕ. Ку хутĕнче шкул ачисем «Шăрпăк вăйă мар», «Кун йĕрки» тата ытти тема тавра калаçма кăмăл турĕç.
Çут çанталăка юратма вĕрентесси те пур лагерь программинче. Унпа килĕшÿллĕн çут çанталăк илемĕ, кĕçĕн туссем пирки ачасемпе тăтăшах калаçнă. Яланхи йăлана хальхинче те пăрахăçлас темерĕмĕр. Ÿкерме юратакансем хăйсен ĕçĕсене конкурса тăратма хапăл турĕç. Ирина Захарова ( 1-мĕш класс), Виктория Казеевăпа Катя Мресова (6-мĕш класс) уйрăмах хитре ÿкернĕ. Тупмалли юмахсен тупсăмĕсене пĕлес енĕпе те ачасем хăйсен пĕлĕвне тĕрĕслерĕç. «Çил çунат» лагере çÿрекенсем смена ĕçĕпе кăмăллă юлчĕç, малашнехи каникулсенче те лагере çÿрес килнине пытармарĕç.