21 января 2009 г.
ЧĂВАШ патшалăх академи симфони капеллине хамăр республикăра кăна мар, Раççейре те лайăх пĕлеççĕ. Мухтавлă коллективăн художество руководителĕ тата тĕп дирижерĕ – талантлă музыкант, Раççей Федерацийĕн халăх артисчĕ Морис Яклашкин профессор.
Христос çуралнă кун тĕлне пултаруллă коллектив «Раштав çути – 2009» ятпа тĕн юррисемпе музыкин программине хатĕрленĕ. Пирĕн района шăпах çак çĕнĕ программăпа килсе çитрĕ те ĕнтĕ январĕн 15-мĕшĕнче академи капелли.
Шăмăршăри Культура керменĕнчи тулли зал – кунта районти ялсенчен те автобуссемпе, çăмăл автомашинăсемпе килсе çитрĕç – чуна пырса тивмелле тĕн юррисене ăшшăн йышăнчĕ, кашни произведени хыççăн тăвăллăн алă çупрĕ.
Уйрăм солистсем вара хăйсен хитре те янравлă сассисемпе – вĕсем микрофонсăрах юрларĕç – программăна хăйне евĕр илем кÿчĕç. И.Александров, В.Вахтеркин, М.Мокшанов, Л.Селиванова, Н.Егорова, Н.Федорова, Зоя Лисицина, Тамара Гурьева, Г.Воробьева, В.Егоров чăваш, вырăс халăх юррисене, чăваш, вырăс композиторĕсен произведенийĕсене чĕре хĕлĕхне хускатса илемлĕн юрларĕç. Пултаруллă баянистсем – Чăваш Республикин культура тава тивĕçлĕ ĕçченĕсем А.Бурундуковпа П.Васильев солистсен аккомпаниаторĕсем пулчĕç. Авраам Федорович баянпа чăваш ташшин кĕввине питĕ ăста шăрантарчĕ.
Программăна вĕçлесе, капелла «Çĕмĕртпе палан» (А.Бурундуков кĕвĕленĕ), «Молодежный вальс» (П.Федоров) тата «Отчизна-мать» (Ф.Лукин) юрăсене мăнаçлăн янăратрĕ.
Тулли содержаниллĕ программăна капелла Васанпа Анат Чаткас ялĕсенче те кăтартрĕ.