21 января 2009 г.
КИВĔ ЧУКАЛТИ Культура çуртĕнче, З.И.Карзанова заведующи ертсе пынипе, час-часах тĕрлĕ мероприятисем иртеççĕ. Зинаида Ильинична ял-йыш канăвне усăллă йĕркелеме тăрăшать. Акă, нумаях пулмасть вăл, библиотекарьсем – Татьянăпа Ирина Чамеевасем пулăшнипе, ял çамрăкĕсем валли кану каçĕ ирттерчĕ. Ăна Раççейре çамрăксен çулĕ пуçланнине халалларĕç.
Çак кун Культура çуртне килнĕ каччăсемпе хĕрсем тÿрех сĕтел хушшине кĕрсе ларчĕç. Техĕмлĕ чейпе, тутлă çимĕçсемпе сăйланнă май, çамрăксем интереслĕ программăпа паллашрĕç.
Кану каçĕн программине вырăнти шкулти педагогсем – Верăпа Ирина Малеевасем ертсе пычĕç. Вĕсем 2009 çулăн Гороскопĕпе паллаштарчĕç, вăл е ку Зодиак паллине кĕрекен çынсене Вăкăр çулĕнче мĕнлерех ăнăçусем кĕтни пирки каласа пачĕç, çамрăксемшĕн кăсăклă викторинăсем, вăйă-конкурссем йĕркелерĕç.
Художество номерĕсем кану каçне илемлетрĕç. О.Карзановапа О.Малеева хальхи эстрада юррисене илемлĕн шăрантарчĕç. Е.Борзова, Л.Денисова, Т.Чамеева, Н.Ивановпа П.Чурбанов вара шÿтлĕ сценкăсем лартса пачĕç. Ялти «Пилеш» фольклор ансамблĕ (ертÿçи З.Карзанова, аккомпаниаторĕ З.Савельев) чăваш юррисемпе савăнтарчĕ.
Çамрăксем кану каçĕпе кăмăллă юлчĕç.