04 февраля 2009 г.
ПУЛТАРУЛЛĂ, тĕрлĕ енлĕ аталанакан вĕренекенсем сахал мар Шăмăршăри пĕтĕмĕшле вăтам пĕлÿ паракан шкулта. Паян сăмахăмăр – вĕсенчен пĕрин пирки.
10 «а» класра ăс пухать Саша Юнкеров. Ун пирки каласа пама ыйтсан, класс ертÿçи В.Семкина çапла çеç каларĕ:
– Вăл пуринчен те маттур: вĕренÿре те, спортра та.
Çак сăмахсене Сашăпа пĕрле вĕренекен юлташĕсем те çирĕплетрĕç, вăл обществăлла ĕçсенче те хастар пулнине палăртрĕç. Ку – ÿстерсе, ытлашши мухтаса калани мар, чăн тĕрĕслĕх.
А.Юнкеров 2001 çултанпах шкулти вĕренекенсен обществăлла «Лидер» пĕрлешĕвĕн чи активлă членĕсенчен пĕри, «Эпĕ тата Тăван çĕршыв» юхăмăн ертÿçи. Тĕрлĕрен мероприятисен планĕсене пурнăçлас ĕçе хастар хутшăнать вăл, вĕсенче хăй те пысăк активлăх кăтартать. Саша – шкулти чи лайăх çамрăк армеецсенчен пĕри. Вăл районта иртекен «Зарница» тата «Орленок» вăйăсене хутшăнманни пĕрре те пулман теççĕ. Сăмахран, А.Юнкеров – 2007 çулта Етĕрнере иртнĕ вăйăсен çĕнтерÿçисенчен пĕри. Кунта вăл винтовкăран перес тĕлĕшпе палăрнă, пĕрремĕш вырăн йышăннă.
Саша мĕн пĕчĕкренех спортпа кăсăкланать, çĕнĕ куна зарядка тунипе пуçлать, хăйне ытти майсемпе те çирĕплетме тăрăшать. Тăхăр çула çитсен, 2002 çулта вăл ачасемпе çамрăксен спорт шкулĕн самбо енĕпе кĕрешекенсен секцине çÿреме тытăннă, пĕр тренировкăна та сиктермен. Унăн ăсталăхĕ ÿссех пырать. Çак хушăра А.Юнкеров районти çеç мар, республикăри тата ун тулашĕнчи ăмăртусене те тăтăш хутшăннă. Тĕслĕхрен, вăл «Юрма» агрохолдинг ирттернĕ ирĕклĕ майпа кĕрешекенсен турнирĕн чемпионĕн ятне темиçе хутчен тивĕçнĕ, Е.Карзанов комиссара асăнса ирттерекен турнирсенче те пĕрре кăна мар çĕнтернĕ. Çакна палăртма уйрăмах кăмăллă: кĕрешÿçĕ тăххăрмĕш класрах самбо тата дзюдо енĕпе пĕрремĕш разряд нормисене пурнăçланă.
Пĕлтĕр Саша вĕренекенсен производство бригадине ертсе пынă, ĕçченлĕхĕпе, ĕçе юратнипе палăрнă, ыттисене хăйĕн ырă тĕслĕхĕпе хавхалантарнă.
Шкулти «Шăмăршă асĕсем» хаваслисемпе тавçăруллисен клубĕн (КВН) хастар членĕ те А.Юнкеров. Клуб 2007 çулта республикăри вăйăсенче çĕнтернинче унăн тÿпи те пĕчĕк мар.
Ырă кăмăллă çын Саша, йывăрлăхра кашнинех пулăшу аллине тăсса пама хатĕр. Çакăншăн хисеплеççĕ юлташĕсем, вĕрентекенсем районти çамрăксен ирĕклĕ дружинин хастар членне.
2009 çул Александр Юнкеровшăн тата тепĕр пысăк пулăмпа палăрса юлĕ – вăл Чăваш Республикин Президенчĕн ятарлă стипендине илсе тăрĕ. Чăннипех тивĕçлĕ çакна вĕренÿре те, спортра та маттур çамрăк.