14 февраля 2009 г.
ЧУКАЛ ял поселенийĕнчи чылай хуçалăхра выльăх-чĕрлĕх йышлă усраççĕ. Вĕсенчен пĕри – И.Матросов. Картиш тулли выльăх унăн: икĕ ĕне, тăватă пăру, тăватă сысна тата çăвăрлакан икĕ сысна. Кунсăр пуçне кайăк-кĕшĕк те сахал мар.
– Килте выльăх усрани çав тери усăллă, - тет кил хуçи. – Продукци те самаях туса илетпĕр. Сĕт, аш-какай сутнă май çемье бюджечĕ те хутшăнсах пырать. Выльăх апатне çу кунĕсенчех çителĕклĕ таран хатĕрлерĕмĕр.
Чукалта выльăх-чĕрлĕх нумай тытакансем татах та пур. Çак шута А.Андреев тата В.Бибуков хуçалăхĕсене те кĕртмелле. Вĕсен шучĕпе, аш-какай, сĕт-çу – чăннипех чĕрĕ валюта.
Пĕр сăмахпа, ÿркенмеççĕ чукалсем, кризис тапхăрĕнче те çухалса каймаççĕ, йывăрлăхран хăйсен вăйĕпе, ĕçченлĕхĕпе тухма тăрăшаççĕ.