26 февраля 2009 г.
РАЙОНТА январĕн 23-мĕшĕнчен пуçласа февралĕн 23-мĕшĕччен оборонăпа массăллă ĕçсен уйăхлăхĕ иртрĕ. Пуянкассинчи пĕтĕмĕшле пĕлÿ паракан тĕп шкул та пĕлтерĕшлĕ мероприятирен айккинче тăрса юлмарĕ. Уйăхлăх пынă тапхăрта пĕлÿ çăл куçĕнче тĕрлĕ конкурс пулчĕ. Ачасене сывă пурнăç йĕркине пăхăнма хăнăхтарассишĕн тата патриотлăх туйăмне вăратассишĕн йĕркеленĕ нумай ĕç пурнăçа кĕчĕ. Сăвă илемлĕ вулакансен конкурсĕнче Кристина Спиридонова (4-мĕш класс), Аня Афанасьева (5-мĕш класс), Наташа Андреева (8-мĕш класс) палăрчĕç. Патриотла юрăсем шăрантаракансен тупăшăвĕнче вара Сергей Алексеев (5-мĕш класс), Никита Никифоров (1-мĕш класс) çĕнтерме пултарчĕç. Сочиненисен конкурсне те нумаййăн хутшăнма кăмăл турĕç. Ачасем хăйсен ĕçĕсенче Тăван çĕршыва юратнине ĕнентерÿллĕ те илемлĕ çырса кăтартнă. 5-мĕш класра пĕлÿ пухакан Рая Харитонован «Шурă çÿçлĕ салтак-ветеран» вырăсла çырнă сочиненине чи лайăххи тесе палăртнă.
Шкул ачисен тавра курăмне пуянлатас, ăс-тăн шайне ÿстерес, ăсталăхне кăтартма майсем туса парас тесе КВН ирттересси йăлана кĕнĕ ĕнтĕ. 8-мĕшсемпе 9-мĕшсем мала тухассишĕн пĕр-пĕринпе ăмăртмаллипех ăмăртрĕç. Оборонăпа массăллă ĕçсен уйăхлăхĕн тĕп мероприятийĕ «Зарница» пулчĕ. Февралĕн 21-мĕшĕнче 3-мĕшсенчен пуçласа 9-мĕшсем таранах спорт уявне хутшăнчĕç – стройпа утса кăтартрĕç, патриотла юрăсем юрларĕç, лабиринт витĕр тухрĕç. Мероприяти жюрийĕ ачасем мĕнле тум тăхăннине те, епле юрланине те çивĕч тишкерчĕ.
«Тĕнчене сăнлатпăр» ÿкерчĕксен конкурсĕ те – уйăхлăх программинчех. Ачасем хăйсен ĕçĕсенче пурăнан пурнăçа еплерех курнине кăтартса панă. Вĕренекенсем аслă ăрăва тивĕçлипе хисепленине те асăрхамасăр иртеймĕн: вĕсем кулленех ĕç тата вăрçă ветеранĕсем патне çÿреççĕ, шыв кÿрсе параççĕ, юр хыраççĕ, кил-çурта тасатма, тирпей-илем кĕртме пулăшаççĕ. 7-мĕш класра ăс пухакансем ав Н.В.Угарина ĕç ветеранĕ патне çитсе килчĕç, ватта май пур таран пулăшса савăнтарма тăрăшрĕç.
Уйăхлăх пынă тапхăрта Пуянкассинчи пĕтĕмĕшле пĕлÿ паракан тĕп шкулта вĕренекенсем нумай ырă ĕç пурнăçларĕç, чунри патриотлăх туйăмне çирĕплетрĕç, сывă пурнăç йĕркине пăхăннинчен лайăхраххи нимĕн те çуккине тепĕр хут ăнланса тивĕçлĕ пĕтĕмлетÿ турĕç.