04 марта 2009 г.
СПОРТ, оборонăпа массăллă ĕçсен уйăхлăхне ирттересси çине Пăчăрлă Пашьел вăтам шкулĕнче пысăк тимлĕх уйăрчĕç. Вĕренекенсем хăюллă, хăй пурнăçне шеллемесĕр Тăван çĕршывшăн, тăван халăхшăн кĕрешекен çын пулма хăнăхас, сывлăха çирĕплетес тĕллевпе тĕрлĕ мероприятисем туса ирттерчĕç. Кашни класрах Раççей Геройĕ О.Долгов, воин-интернационалистсем çинчен калаçусеем иртрĕç, Чечня тата Афганистан вăрçисене хутшăннă хамăр ялти паттăрсемпе тĕл пулса калаçрĕç. Çак тĕлпулусем кашни ачашăн усăллă пулчĕç, чунĕсенче чăн-чăн патриот туйăмĕсене вăратрĕç. Тăван çĕршыва хÿтĕлекенсен кунне халалласа шкулта вĕренекен арçын ачасем тĕрлĕ конкурссенче тупăшрĕç, хăйсен çивĕчлĕхĕпе хастарлăхне тĕрĕслерĕç.
Çак уйăхлăхра сывлăха тĕреклетесси çине те пысăк тимлĕх уйăрчĕç. Хĕллехи «Орленок», «Зарница» вăййисенче уйрăмах 8-мĕш тата 11 «а» класра вĕренекенсем палăрчĕç. Ял поселенийĕнче иртнĕ «Йĕлтĕр йĕрĕ» чупăва пысăк йышпа хутшăнса та малти вырăнсене тухма пултарчĕç ачасем. Кĕçĕн класра вĕренекенсем «Хаваслă стартсенче», аслăраххисем йĕлтĕрçĕсен эстафетинче ăмăртрĕç. Уйăхлăха халалланă мероприятисене кашни класс ертÿçи йĕркелесе ирттерчĕ. Çак мероприятисене ачасем хастар хутшăнчĕç, иртнĕ кунсемпе кăмăллă юлчĕç.