04 марта 2009 г.
РЕСПУБЛИКĂРА пыракан «Çĕнтерÿ салючĕ» фествиале старт парса, районта Раççей Геройне Олег Долгова асăнса патриотлă юрăсен фестивалĕ иртрĕ. Пăчăрлă Пашьел тата Карапай Шăмăршă зонисем тăрăх йĕркеленĕ конкурссен çĕнтерÿçисем çак кунсенче Патиреке – фестивалĕн районти финалне пухăнчĕç.
Культура çуртне килнисем малтанах Палтиел çыннин – А.Федоров хĕрлĕармеецăн кун-çулне çутатакан электронлă материалпа паллашрĕç. Андрей Васильевич 1941 çулта фронта тухса кайнă. Смоленск облаçĕнчи Ельня хулин таврашĕнче вăл паттăрсен вилĕмĕпе вилнĕ. Хыпарсăр çухалнисен шутĕнче пулнă. 63 çул иртнĕ хыççăн Смоленск облаçĕнчи шырав отрячĕ А.Федоров салтакăн вил тăприне унăн медальонĕ тăрăх тупса палăртнă. Салтакăн мăнукĕ Н.Долгов хăйĕн çывăх тăванне масара куçарса пытарнă çĕре кайса килнĕ, ун умĕнче пуç тайнă. Çак саманта ÿкерсе илнĕ видеокадр- сене залра ларакансем хумханса пăхрĕç.
Малалла вара фестивалĕн финалти концерчĕ пуçланчĕ. Ансамбльсемпе солистсен художество пултарулăхĕпе ял çыннисем кăсăкланса паллашрĕç. Сцена ăстисем пĕринчен тепри пултаруллăрах пулнă май, çĕнтерÿçĕсене палăртма çăмăлах килмерĕ жюри членĕсене.
Концертăн кăтартăвĕсене пĕтĕмлетсен «Пĕччен юрласси» номинацире, «Солдатская» юрра илемлĕн шăрантарса А.Андронов (Пуянкасси ялĕ) пĕрремĕш вырăн çĕнсе илчĕ. «Четыре клена» юрăпа М.Семенова (Виçпÿрт Шăмăршă шкулĕ) – иккĕмĕш, «Пора домой» юрăпа А.Медведев (Карапай Шăмăршă шкулĕ) – виççĕмĕш вырăнсене йышăнчĕç.
«Дуэтпа юрласси» номинацире Е.Захаровапа Н.Угарина (Шăмăршăри ача-пăча искусство шкулĕ) – пĕрремĕш, М.Семеновапа А.Малова (Виçпÿрт Шăмăршă шкулĕ) тата М.Давыдовапа Н.Чемерова (Шăмăршă шкулĕ) – иккĕмĕш, К.Долговапа А.Кузьмина (Палтиел ялĕ) виççĕмĕш вырăнсене тухрĕç.
«Вокал ансамблĕ» номинаци тăрăх 1-3 вырăнсене Шăмăршă («У деревни Крюково»), Васан («Вдовы») тата Карапай Шăмăршă («Мальчишки») шкулĕсен ансамблĕсем пайларĕç.
«Автор юррине юрласси» номинацире Е.Захаровапа (Шăмăршă шкулĕ) Т.Долгова (Палтиел ялĕ) чи пултаруллисем пулчĕç.
Фестивальте призлă вырăнсем йышăннă уйрăм солистсемпе вокал ансамблĕсем райадминистрацин вĕрентÿ, çамрăксен политикин тата культура пайĕн Грамотисемпе призĕсене илчĕç.