07 марта 2009 г.
ЧИР-ЧĔР çакланни пирĕншĕн чăн-чăн инкек пулса тăрать. Ача чирлесе ÿкни вара темиçе хут йывăртарах. Унăн шуралса е хĕрелсе кайнă сăн-пичĕ ашшĕ-амăшĕн канăçне çухаттарать, вăл йывăррăн сывлани, пĕр чарăнмасăр йĕни чĕрене такам йĕппе тирнĕн ыраттарать. Ача-пăча врачĕсемпе медсестрасем пулăшнипе ывăл тĕпренчĕкĕ е хĕр пĕрчи каллех хăйĕн ăшă куллине кăтартсанах çемьене канăçлăх таврăнать, тĕнче те хитререх курăнать. Сывлăхлă ачана больницăран илсе тухнă чухне эпир ача-пăча уйрăмĕнчи медицина ĕçченĕсене куççуль витĕр тав тăватпăр.
Районти тĕп больницăри ача-пăча уйрăмĕн заведующийĕ С.Низамова хăйне пулăшакан медсестрасемпе пĕрле халиччен миçе ачана çĕнĕрен ура çине тăратнине, мĕн чухлĕ çемьене савăнăç кÿнине шутласа та кăлараймăн. Султания Шейхулловна ертсе пыракан пысăках мар коллектив кунран-кун, çулран-çул чăтăмлăн та ăнăçлăн ĕçлесе пырать. М.Паймина, А.Андреева, С.Воробьева, Р.Карзановапа С.Силина медсестрасем те ĕçре пуян опыт пухнă, 25 çул ытла ĕçлеççĕ.
Паллă ĕнтĕ, ĕçри ăнăçу чи малтан руководительтен килет. С.Низамова – опытлă врач. Районти тĕп больницăн ача-пăча уйрăмĕнче вăл 1989 çултанпа – Чăваш патшалăх университечĕн педиатри уйрăмĕнчен вĕренсе тухнăранпа вăй хурать. Малтанласа врач-педиатр пулса ĕçленĕ, 1997 çулхи январьте вара ăна уйрăм заведующийĕ пулма çирĕплетнĕ.
Султания Шейхулловна – пултаруллă руководитель. Вăл хăйĕнчен те, ыттисенчен те çирĕп ыйтать, сиплев ĕçĕн ăнăçлăхĕшĕн нумай тăрăшать.
Районти тĕп больницăн пысăк коллективĕнче С.Низамована тивĕçлипе хисеплеççĕ. Районта та ăна чылайăшĕ паллаççĕ, профессилле ăсталăхшăн сума сăваççĕ. Пархатарлă ĕçшĕн Султания Шейхулловнана ЧР Сывлăх сыхлавĕн министерствин, район больницин администрацийĕн Хисеп грамотисемпе чысланă.
Мăшăрĕпе, Реис Небулловичпа, хĕрпе ывăл çуратса ÿстернĕ. Румия Чăваш патшалăх университетĕнче, Рустем Шăмăршăри вăтам шкулта вĕренет.
Çак кунсенче Султания Шейхулловна 50 çул тултарчĕ. Ылтăн юбилей ячĕпе ăна юратнă мăшăрĕ, ачисем, тăванĕсем-пĕлĕшĕсем, пĕрле ĕçлекенсем ăшшăн саламларĕç, çирĕп сывлăхпа тулли телей, ĕçре малашне те ăнăçу сунчĕç.