11 марта 2009 г.
«ПУШ уйăхĕн вĕçĕнче хĕвел пăхрĕ ăшăтса», - «Нарспи» поэмăри çак йĕркесем яланлăхах пуçа кĕрсе юлнă. Кăçал хĕвел иртерех те ăшăтма пуçлани, уй-хирте юр питех те сахал пулни çуркунне васкаса çитнине çирĕплетет.
«Хапха умне туй килсен тин хăнасене пăхмашкăн хатĕрленме пуçламаççĕ», - тенĕ ваттисем. Çур аки пирки те çавнах каламалла. Ахальтен мар ĕнтĕ район пуçлăхĕ В.П.Фадеев кашни канашлурах паха вăрлăх хатĕрлес, минераллă удобренисемпе топливо туянас, техникăна юсас ыйтусене çивĕч çĕклет, яваплă çынсенчен çирĕп ыйтать.
Мартăн 5-мĕшĕнче вара çур акине хатĕрленес ыйтупа район администрацийĕ ятарласах семинар-канашлу ирттерчĕ, ун ĕçне хуçалăхсен, ял поселенийĕсен ертÿçисем тата фермерсем хутшăнчĕç. Семинар-канашлăва ятарласах Шупашкартан Чăваш Республикин ял хуçалăх министрĕ С.П.Димитриев, республикăри ĕçпе тивĕçтерекен патшалăх службин пай пуçлăхĕн çумĕ Т.А.Аскарова, Перекет банкĕпе «Россельхозбанкăн» республикăри уйрăмĕсен представителĕсем килнĕ.
Малтанах «Агродор» ООО хуçалăха çитсе курчĕç, кунта çур акине хутшăнакан техникăпа, вăрлăх тасатакан машинăсемпе паллашрĕç. Хуçалăх ертÿçи Г.Н.Герасимов каланă тăрăх, ака-суха ĕçĕсене хатĕрпе пĕрех. 149 тонна паха вăрлăх хатĕрленĕ, çунтармалли-сĕрмелли материалсем, минераллă удобренисем туянаççĕ. Техника юсавлăхне тепĕр хут тĕрĕслеççĕ. Хуçалăхра ресурссене перекетлекен çĕнĕ техника туянасси çине пысăк тимлĕх уйăраççĕ. БДН-3х4 çине чылайăшĕ ăмсанса пăхрĕ: эх, пирĕн патăрта та çак агрегат пулсанччĕ!
Семинарăн пленарлă пайĕ район администрацийĕн пысăк залĕнче иртрĕ. Республикăри ĕçпе тивĕçтерекен патшалăх службин пай пуçлăхĕн çумĕ Т. А.Аскарова халăха ĕç тупса парас тĕлĕшпе йышăннă çĕнĕ мерăсемпе паллаштарчĕ.
Чăваш Республикинчи ял хуçалăх министрĕн çумĕ С.П.Димитриев кăçалхи çур аки уйрăмлăхĕсем, ял хуçалăх предприятийĕсемпе фермерсене патшалăх паракан çăмăллăхсем çинчен каласа пачĕ.
Семинар-канашлу ĕçне пĕтĕмлетнĕ май, район пуçлăхĕ В.П.Фадеев Çĕр ĕçченĕн çулĕнче начар ĕçлеме юраманнине палăртрĕ. Паян кашни ертÿçĕн, специалистăн, ялта пурăнакан кашни çыннăн çур аки пирки шутламалла, лайăх пахалăхпа, кĕске вăхăтра акса-лартса хăварсан пысăк тухăç илме шанăç пулĕ.
Канашлу вĕçĕнче савăнăçлă самант пулчĕ: «Единая Россия» партин вырăнти уйрăмĕн секретарĕ В.П.Фадеев унччен Раççейри Аграри партийĕн членĕнче тăнисен ушкăнне «Единая Россия» парти членĕн билечĕсене пачĕ.