11 марта 2009 г.
Тыр-пул тата сахăр чĕкĕнтĕрĕн тухăçĕпе «Колос» Агрофирма» ЗАО çултан çулах районта çеç мар, республикăра та малтисен шутĕнче. «Ир тăракан çерçи тутă пулнă», - шÿтлеме юратать хуçалăхăн тĕп агрономĕ, Чăваш Республикин тава тивĕçлĕ агрономĕ Н.А.ВОРОБЬЕВ.
Николай Андреевичпа çывхарса килекен çур аки пирки калаçу пуçартăмăр.
– Çур аки валли ĕç планĕ туса хатĕрлерĕмĕр, - терĕ Н.А.Воробьев. – 300 гектар сахăр чĕкĕнтĕрĕ, 500 гектар çурхи тулă, 200 гектар урпа акатпăр. Кĕр тыррисем 340 гектар йышăнаççĕ. Тĕрĕслесе пăхрăм, лайăх хĕл каçаççĕ.
– Эсир минераллă удобренисемпе туллин усă куратăр, тухăç çавăнпа та пысăк пуль;
– Тĕрĕс, «çĕр çăкăрне» шеллеместпĕр. Çурхи тырăсен пĕр гектарĕ пуçне пĕрер центнер кăткăс удобрени хыватпăр. Сахăр чĕкĕнтĕрне акиччен гектар пуçне пилĕкшер центнер удобрени сапатпăр. Юр кайсанах кĕрхи культурăсене апатлантаратпăр, гектар пуçне 150-шар килограмм удобрени хыватпăр.
Пирĕн вăрлăхсем пурте кондициллĕ, пысăк репродукциллĕ. Вăрлăхсене имçамласа кăна акатпăр.
– Çур аки техники юсавлă-и;
– Анатолий Петров виçĕ сеялкăллă агрегата хатĕрлесе çитерчĕ. Сергей Кузьмин та чĕкĕнтĕр акакан техникăна тĕплĕн юсарĕ. Хальхи вăхăтра юсавçăсен звенин членĕсем – Анатолий Петров, Валерий Матвеев, Николай Мресов, Николай Тимофеев тата Владимир Семенов – культиватор лаписене хăйраççĕ, вак-тĕвек юсав ĕçĕсене пурнăçлаççĕ.
Сеялкăсем те, сÿресем те хире тухма хатĕр.
– Механизаторсем ĕç укçи пирки ÿпкелешмеççĕ-и;
– Ÿпкелешме сăлтав çук. Çур аки тата вырма вăхăтĕнче пирĕн механизаторсем 10-15 пин таран ĕçлесе илеççĕ. Сеяльщиксен ĕç укçи те 8-9 пин патнех пуçтарăнать. Çавна пулах эпир кадрсем çуккипе нушаланмастпăр, механизаторсем çителĕклех.
Кĕркунне мĕнпур лаптăк çинче çĕртме сухи туса хăвартăмăр. Çур акинче пысăк вăй хурса ĕçлесен, лайăх тухăç илме шанăç пур. Кăçал хирте юр сахал, çавăнпа та нÿрĕк тытасси тата хăвăртрах акса хăварасси чăн малти вырăнта тăрĕ.