11 марта 2009 г.
ВУТ-ÇУЛĂМПА асăрханусăр пулни кил-çурта кăмрăк купине çавăрать е юрăхсăра кăларать. Пушарта çынсем çунса-чыхăнса вилнĕ тĕслĕхсем те пулкалаççĕ районта. Граждансене хăрушлăх пирки асăрхаттарас, вĕсене инкекрен сыхланса пурăнма вĕрентес тĕллевпе патшалăхăн пушар надзорĕн инспекторĕсем, Шăмăршăри 42-мĕш номерлĕ пушар чаçĕн тата ВДПОн районти Совечĕн работникĕсем районти предприятисемпе организацисенче, учрежденисенче тĕрлĕ мероприятисем йĕркелеççĕ.
Пушар чаçĕн Карапай Шăмăршăри уйрăм постчĕн тата ВДПОн районти совечĕн работникĕсем çак кунсенче «Елочка» профилакторире сипленекен тата вĕренекен ачасемпе «Вутпа асăрхануллă пулар» мероприяти ирттерчĕç. Малтанах ВДПОн районти Совечĕн председателĕ И.Крылова район территорийĕнчи кăçалхи пушарсем тĕлĕшĕнчи лару-тăрупа паллаштарчĕ, юлашки çулсенче ачасен айăпне пула вут-çулăм алхаснă тĕслĕхсем çинче чарăнса тăчĕ, асăрханусăр пулни пысăк инкек патне илсе пыни пирки аса илтерчĕ.
Кун хыççăн çамрăк пушарниксен ирĕклĕ дружинисен членĕсем – Шăмăршăри вăтам шкулта вĕренекен Еленăпа Ольга Косаревасем, Елена Семенова, Вероника Сетнерова тата Анна Чемерова профилакторин актовăй звлне пухăннă ачасемпе пушар хăрушсăрлăх темипе çыхăннă конкурссем, викторинăсем ирттерчĕç.
Çакнашкал мероприятисене кăçал районта çулталăк тăршшĕпех шкулсемпе ача сачĕсенче йĕркелеме палăртнă.