21 марта 2009 г.
УЧЕНĂЙСЕМ çакна çирĕплетеççĕ: пĕр гектар çинчи тулă хăйне ÿссе çитĕнме вăтамран 19-40 килограмм азот, 8-14 килограмм фосфор, 22-40 килограмм таран кали пĕтерет. Çавна май тăпра пулăхлăхĕ чакса пырать. Апла пулсан, çитес çул тухăç ан чактăр тесен, уй-хире минераллă удобренисем хывмалла.
Çур аки те çывхарса пырать. Ăна ăнăçлă ирттерсе яма кăçал районĕпе, фермер (хресчен) хуçалăхĕсемпе пĕрле сахалтан та 800 тонна минераллă удобрени кирлĕ. Паянхи куна ку тĕлĕшпе лару-тăру мĕнлерех-ха;
Хальлĕхе «Исток» ОООра 10 тонна, «Агрофирма «Карлинская» ЗАОра 20 тонна, «Восход» СХПКра 20 тонна аммиак селитри, «Агродор» ОООра 20 тонна хутăш удобренисем пур. Районĕпе илсен, ку кăтарту 95 тоннăпа танлашать.
Çавăн пекех «Шанс» ООО, «Мир» ЗАО, «Агрофирма «Колос» ЗАО, «Агросервис» ООО «çĕр çăкăрне» туянма килĕшÿ тунă.
Фермер (хресчен) хуçалăхĕсене уйрăммăн илес пулсан, вĕсене кăçал 75 тоннăран кая мар удобрени кирлĕ. Хальлĕхе вĕсен тĕрлĕ йышши удобренисем 25 тонна пур.