28 марта 2009 г.
НУМАЯХ пулмасть Шăмăршăри тĕп библиотекăра Чăваш Республикинчи кăнтăр районĕсен библиотекарĕсен семинарĕ пулчĕ. Çак семинарта «Тăван ен таланчĕсем» клубăн черетлĕ ларăвĕ те иртрĕ. Кÿршĕсем пирĕн районăн пултаруллă сăвăçисемпе паллашрĕç. Вĕсенчен пĕри Роза Любимова – Шăмăршă лесничествин Энтĕрьелĕнчи питомникĕнче йывăç хунавĕсем çитĕнтернĕ çĕрте ĕçлекен. Библиотека ĕçченĕсем сăвăçăн хайлавĕсене лайăх хак парса йышăнчĕç.
Кунсăр пуçне Роза Петровна – кĕнеке тусĕ те. Энтĕрьел библиотекинче вăл вуламан кĕнеке сахал. Детективсем, историлле повеçсемпе романсем... Уйрăмах чăваш писателĕсем çырнă кĕнекесене вулама юратать вăл. Н.Петровская, В.Эльби, Илпек Микулайĕ, Юхма Мишши тата ытти нумай авторсен кĕнекисене вуласа тухнă. Хăй вуласа тухнă кĕнекесемпе ыттисене те паллаштарать. Библиотекăна килекен çĕнĕ литературăпа паллашсах тăрать вăл. Библиотека ирттерекен мероприятисене те хапăл тусах хутшăнать Роза Петровна. Яланах ăшă кулăллă, уçă кăмăллă хĕрарăмпа калаçма та кăмăллă.