01 апреля 2009 г.
РАЙОН пуçлăхĕ В.П.Фадеев кăçалхи апрелĕн 1-мĕшĕнчен пуçласа 30-мĕшĕччен çуркуннехи санитарипе экологи уйăхлăхне ирттересси çинчен йышăну кăларнă. Ялсене тирпей-илем кĕртес ĕçе йĕркелесе-ертсе пыма оргкомитет туса хунă, унăн ертÿçи – район пуçлăхĕн пĕрремĕш çумĕ В.Н.Никифоров.
Уйăхлăх вăхăтĕнче тирпей-илем кÿмелли субботниксемпе воскресниксем йĕркелеме, йывăçсемпе тĕмсем лартма, вĕсене выльăх-чĕрлĕх сиенлесрен карта тытса пÿлме палăртнă.
Ял поселенийĕсен пуçлăхĕсен урамсемпе кил умĕсенче тивĕçлĕ йĕрке тумалла, халăха йывăçсемпе тĕмсем лартма активлă хутăштармалла, уйрăмах ишĕлекен çырма-çатрасен хĕррисене ешĕллентерес тĕлĕшпе тивĕçлĕ мерăсем йышăнмалла.
Оргкомитет ялсене тирпей-илем кĕртмелли тата йывăçсемпе тĕмсем лартмали уйăхлăха, унчченхи пекех, шкул ачисем уйрăмах хастар хутшăнасса çирĕп шанса тăрать.