01 апреля 2009 г.
«КАНАШ» фермер хуçалăхĕ – районта чи хастар ĕçлекенсенчен пĕри. Ывăнма пĕлмен вĕри чăваш – Сергей Угарин – хуçалăха тĕреклетесси хăйсенчен кăна килнине, патшалăх пулăшăвĕ çине шанса пурăнмалла маррине лайăх ăнланать.
Сергей Михайловичпа çак кунсенче тĕл пулсан çитес çур аки пирки калаçу пуçартăмăр.
– Чăваш Республикин Президенчĕ Н.В.Федоров ял ĕçченĕсем умне пысăк тĕллев лартрĕ, - терĕ С.М.Угарин. – Тĕш тырă тата çĕр улми туса илессине нумай ÿстермелле, пушă выртакан çĕрсене сухаласа вĕсемпе усă курма пуçламалла. Хамăр тăрăшсан, çанталăк пирĕн майлă пулсан уй-хир тухăçне ÿстерме пулатех.
– Сергей Михайлович, сирĕн хуçалăхăра пĕчĕк теме çук – 286 гектарпа усă куратăр. Кăçал çак çĕр çинче мĕнле культурăсем çитĕнтересшĕн-ха;
– Пирĕн кĕр тыррисем 80 гектар йышăнаççĕ. Тĕрĕслесе пăхни кĕр тыррисем начар мар хĕл каçнине кăтартса пачĕ.
100 гектар урпа акма палăртрăмăр, вăрлăх кондицие ларнă. Çавăн пекех сăнаса пăхмалăх 6 гектар «Свеча» сортлă тулă акатпăр. Çак сорт пирĕн условисенче гектартан 40 центнер таран тухăç пама пултарать теççĕ. Чăнах та çапла пулсан, килес çул унăн лаптăкне темиçе хут ÿстерĕпĕр.
15 гектар çĕр улми лартатпăр. «Удача», «Невский», «Жуковский ранний» сортсемпе усă куратпăр.
Кăçал таса пусă та хăварма шутлатпăр. Çĕре кантармалла, пусăçаврăнăшне те çирĕп пăхăнмалла.
– Çунтармалли-сĕрмелли материалсем, минерал удобренийĕсем çитеççĕ-и;
– Çур акине эпир пур енчен те хатĕр. Топливо çителĕклех. Удобренисем пирки калас пулсан, вĕсемсĕр пĕр гектар та акмастпăр. Çĕр улми валли 10 тонна диаммафоска, тĕштырăсене апатлантарма 20 тонна аммиак селитри туянтăмăр.
Техника юсавлă, виçĕ трактор та паян тесен паян хире тухма хатĕр. Сеялка агрегачĕ çине, иртнĕ çулсенчи пекех, хам ларатăп. Хам алăпа акни шанчăклăрах пек туйăнать.