11 апреля 2009 г.
ÇАК кунсенче Шăмăршăри Культура керменĕнче хореографи коллективĕсен республикăри III фестивалĕн зонăри конкурсĕ иртрĕ. «Ташша яра пар!» фестивале Шăмăршă, Патăрьел, Комсомольски тата Елчĕк районĕсен ташă коллективĕсем хутшăнчĕç. Жюрие Шупашкарти Трактор тăвакансен Культура керменĕн «Сувар» халăх ташă ансамблĕн илемлĕх ертÿçи тата балетмейстерĕ, РФ тата ЧР культура тава тивĕçлĕ ĕçченĕ, РФ Культура министерствин «Душа России» премийĕн лауреачĕ А.Музыкантов председатель пулса ертсе пычĕ.
Конкурс программине Шăмăршă районĕн ташă коллективĕсем уçрĕç. «Антонина» халăх ташă коллективĕ, кăтартуллă «Фламинго» ташă ансамблĕ тата Палтиелĕнчи «Созвездие» ташă ансамблĕ тĕрлĕ ташăсене илемлĕн ташласа кăтартрĕç.
Çак конкурсра чăваш, вырăс, тутар, хальхи эстрада тата цыгансен, украинецсен, молдовансен, узбексен ташшисем пулчĕç.
Мероприяти вĕçленсен жюри членĕсем районсенчи ташă коллективĕсен руководителĕсемпе тĕрлĕ ташăсен пахалăхне сÿтсе яврĕç, хăш-пĕр çитменлĕхсене асăнчĕç.