11 апреля 2009 г.
АСЛĂ Çĕнтерÿ тунăранпа 65 çул çитсе пынине, Çĕр ĕçченĕн тата Çамрăксен çулне халалланă районти фестивале хутшăнса, Васан ял поселенийĕн илемлĕ пултарулăх коллективĕсемпе солисчĕсем интереслĕ те тулли содержаниллĕ концерт программипе савăнтарчĕç.
Концерта – вăл Васанти Культура çуртĕнче иртрĕ – хор «Салам, çуралнă çĕр» тата «Березовые сны» (аккомпаниаторĕ С.Никишина, дирижерĕ Т.Яковлева) уçрĕ. Çак юрăсем, профессилле ăсталăхпа хатĕрленĕскерсем, илемлĕн те мăнаçлăн янăрарĕç. Хĕрарăмсен ансамблĕ «Ăçта-ши;», «Хăна юрри», арçынсен ушкăнĕ «Коммунальная квартира», Тихоновсен çемье ансамблĕ «Чÿречене яри те уçса ярăр» юрăсене хитрен шăрантарчĕç.
Ж.Антипова, М.Емдюковапа А.Ильина – триопа, Ю.Гордеевапа В.Мердеева, Иванпа Валентина Тихоновсем – дуэтпа, С.Тихонова, А.Ильина, И.Тихонов пĕчченшерĕн килĕшÿллĕ юрларĕç. Ачасен ушкăнĕ «Вечерний хоровод», каччăсемпе хĕрсен ансамблĕ «Не было печали» юрăсемпе килентерчĕç.
Культура çурчĕ çумĕнчи хĕрсен ташă ансамблĕ (ертÿçи Т.Полякова) чăваш, вырăс, хĕвел тухăç ташшисене, ачасен ушкăнĕ çамрăксен вальсне хитрен ташларĕç.
Ачасен «Мерчен» халăх ташă коллективĕн (ертÿçи ЧР тава тивĕçлĕ культура ĕçченĕ Г.Ларшников) тата арçынсен «Умарино» фольклор ансамблĕн (ертÿçи Ж.Антипова) юрри-ташшине те тулли зал кăмăллăн йышăнчĕ.
Концерт программине А.Ильинапа Ж.Антипова ăста ертсе пычĕç.
Апрелĕн 21-мĕшĕнче Шăмăршăри Культура керменĕнче фестивалĕн гала-концерчĕ иртет. Унти сцена çине районти чи пултаруллă художество ушкăнĕсемпе солистсем тухаççĕ.