11 апреля 2009 г.
ХАМĂР пурăнакан тавралăхри тасалăхпа тирпейлĕхшĕн, халăхăн санитарипе эпидемиологи тĕлĕшĕнчи ăнăçлăхĕшĕн, пытармăпăр, çителĕксĕр тăрăшатпăр. Ахальтен мар çакна республика Президенчĕ те çирĕп асăрхаттарса каланă, ку енĕпе йĕрке тума милици ĕçченĕсем умне те тĕллев лартнă. Çавна май шалти ĕçсен районти пайĕн сотрудникĕсем те ку енĕпе палăртнă мероприятисене пурнăçлама тытăнчĕç.
Халăх пурăнакан вырăнсене, урамсене, вăрманпа парк зонисене, юханшывсемпе кÿлĕсен, пĕвесен çывăхне суйласа тĕрĕслени юлашки вăхăтра çак объектсенчи санитарипе эпидемиологи тата экологи тĕлĕшĕнчи лару-тăру япăхланнине яр-уççăн çирĕплетет.
Промышленноçра тата йăлара усă курнă каяшсене тытнă чухне саккун ыйтнине пăхăнман тĕслĕхсем нумай. Вĕсене пухмалли, турттарса каймалли, сиенсĕрлетмелли, упрамалли, чавса пытармалли условисемпе меслетсене пăхăнмаççĕ.
Çавна май малашне милици ĕçченĕсем, объектсенчи санитарипе эпидемиологи тата экологи тĕлĕшĕнчи лару-тăрăва тĕрĕслесе тăма тивĕçлĕ органсене явăçтарса, хамăр пурăнакан тавралăхри тасалăхпа тирпейлĕхшĕн тăрăшманнисем пирки протокол çыраççĕ, предписани тăратаççĕ.
Хăшпĕрисем, акă, намăс-симĕсе пĕлмесĕр транспорта ятарласа уйăрман вырăнсенче юсаççĕ, пĕвесемпе юханшывсем хĕрринче çуса тасатаççĕ, тавралăха варалаççĕ. Ку кăна мар, теприсем транспорта ача-пăча площадкисене, газонсене, симĕслетнĕ ытти вырăнсене, çуртсем çумĕнчи иртсе çÿремелли çулсем çине лартма именмеççĕ. Çапла вĕсем йăлари каяшсене турттаракан транспорта кĕрсе тухма чăрмантараççĕ. Çулсем çине тĕрлĕ ăпăр-тапăр тухса пăрахакансен те явап тытма тивет. Харпăр хăй пурăнакан çуртсем умĕнче темиçешер çул строительство материалĕ, юсавсăр машина-трактор юхăнса выртнине пур çĕрте те асăрхама пулать. Вĕсен урамра пулмалла мар. Асăрхаттарнă хыççăн та йĕрке тумасан, вĕсен хуçисене саккунпа килĕшÿллĕн явап тыттараççĕ.
«Чăваш Республикинче административлă право йĕркине пăсни çинчен» саккунпа килĕшÿллĕн, йытăсемпе килти ытти чĕрчунсем тытмалли правилăсене, ваккăн сутмалли объектсем вырнаçтармалли йĕркене пăхăнманнисенчен малашне çирĕп ыйтмалла пулать.
Паллах, çакă вăхăтлăха, ячĕшĕн тумалли ĕç пулмĕ, хамăр тавралăхри тасалăхпа тирпейлĕхшĕн, халăхăн санитарипе эпидемиологи тĕлĕшĕнчи ăнăçлăхĕшĕн куллен, тĕллевлĕн вăй хурăпăр.