18 апреля 2009 г.
ПАСПОРТ – гражданинăн тĕп докуменчĕ. Тивĕçлĕ документсем пуçтарас, гражданин валли паспорт çырса парас, çынсем килнине-кайнине регистрацилесе тăрас енĕпе районти миграци службинче Т.Кувшинова ĕçлет. Ырă кăмăллă çамрăк хĕрарăм çак службăра 1994 çулхи апрельтенпе – пĕр улшăнмасăр 15 çул тăрăшать. Хăйĕн тивĕçне яланах тÿрĕ кăмăлпа пурнăçлать вăл. Граждансене ăшшăн кĕтсе илет.
– Татьяна Ивановна нихăçан та сехет çине пăхса ĕçлемест, кирлĕ пулсан канмалли кунсенче те ĕçе килет, - терĕ РФ Миграци службин Чăваш Республикинчи управленийĕн район территорийĕнчи пункчĕн начальникĕ, шалти служба майорĕ И.Севрюгин. – Унчченхи СССР паспорчĕсене Раççейĕннипе ылмаштарнă çулсенче те, ĕç калăпăшĕ çав тери пысăк пулнине пăхмасăр, чăтăмлăн ĕçлерĕ вăл. Юлашки çулсенче пирĕн служба ĕç-хĕлĕнче те компьютер технологийĕсемпе усă курасси ÿснĕçемĕн ÿссе пырать. Татьяна Ивановна компьютер техникине хăвăрт алла илчĕ. Кăçал пĕрремĕш кварталта граждансене пурĕ 434 паспорт хатĕрлесе панă.
Паллах, тивĕçлĕ пĕлÿ илни те ĕçре пулăшсах пырать çамрăк служащие. Т.Кувшинова 2007 çулта заочнăй майпа Шупашкарти правăпа управлени академийĕн юриспруденци уйрăмне пĕтернĕ.
Татьяна Ивановнăн пурнăçĕ нумаях пулмасть тепĕр событипе те палăрса юлчĕ: юратнă мăшăрĕпе – Валерий Кувшиновпа пĕр çемьене пĕрлешнĕренпе шăпах 20 çул çитрĕ. Кувшиновсем 2 хĕр ÿстереççĕ.
Хăйĕн ĕçне профессилле ăсталăхпа туса пынăшăн Т.Кувшинована Хисеп грамотисемпе Тав хучĕсем парса чысланă.