22 апреля 2009 г.
СĂМАХĂМА Шăмăршă урамĕпе иртсе пыракан икĕ хĕрарăм калаçăвĕнчен пуçлас терĕм. Çав кун район центрĕнчи тĕрлĕ кантурсенче вăй хуракансем хăйсене çирĕплетсе панă лаптăксене тирпей-илем тума тухнăччĕ.
– Мĕн, Шупашкартан пысăк çын килет-и; – терĕ пĕр хĕрарăмĕ, сăнпа ăна 30-35 çулсенче теме пулать.
– Килет пуль çав, бордюрсене те, йывăçсене те шуратаççĕ, - сăмах хушрĕ тепри, малтанхинчен кăшт аслăраххи.
Çак калаçăва манса кайсан та юратчĕ пулĕ, анчах çÿлте асăннă хĕрарăмсем пеккисем – урамсене пысăк хăна килес умĕн çеç тасатмалла тесе шутлакансем – чылай тупăнни тарăхтармаллипех тарăхтарать. Хамăр пурăнакан ял, урам, кил умĕ тирпейлĕ те илемлĕ пулсан хамăршăнах лайăх пулнине хăçан пурсăмăр та ăнланса илĕпĕр-ши;
Чунтан тăрăшса, хавхаланса аслă урама тирпейлесе тухрăмăр. Тепĕр ирпе ĕçе кайнă чух газон çинче сăра кĕленчи, сигаретăн пушă пачки йăваланса выртнине асăрхарăм. Эх, терĕм хам ăшăмра, харпăр-хăй культури енĕпе ют çĕршывсене хуса çитме пире 100 çул та çитеймĕ. Германире, сăмахран, урама пирус тĕпне пăрахнăшăн та пысăк штраф тÿлеттереççĕ, Францире вунă талăка хупса та хураççĕ. Эпир вара витрипех тасамарлăх кăларса тăкнине те курман-илтмен пулатпăр, çырма хĕррисем, çул хĕрринчи вăрман тăрăхĕсем чăн-чăн свалкăна çаврăннă. «Пирĕн патăрта ун пек мар» тесен ĕненесех килмест: ял-ял тăрăх çÿренĕ чух ырă тĕслĕх ытла та сахал куратпăр-çке...
Ял поселенийĕсен пуçлăхĕсен, депутатсен, старостăсен, ялти интеллигенцин паянхи пек тирпейсĕр пурăнма юраманни çинчен халăха ăнлантарса памалла, паллах, чăн малтан хăйсен ырă тĕслĕх кăтартмалла. Субботниксене те ячĕшĕн çеç (ял поселенийĕн администрацийĕнче ĕçлекенсемпе культработниксем хутшăннипе кăна) ирттерес марччĕ. Ялти ĕçлеме пултаракан кашни çын урама, кил умне тирпей-илем тума тухтăрччĕ.