22 апреля 2009 г.
УЙРĂМАХ сыхлакан çут çанталăк территорийĕсене халалланă «Парксен маршĕ» апрель уйăхĕнче çĕршывĕпех старт илнĕ. Тĕнчипех сарăлнă акцие апрелĕн 17-мĕшĕнче республикăри Çамрăксен экологи дружинин членĕсемпе студентсем те явăçнă. Вĕсем пĕтĕм тĕнчери Çĕр кунĕпе килĕшÿллĕн (апрелĕн 22-мĕшĕ) Чăваш Енре иртекен экологи мероприятийĕсене хастар хутшăнаççĕ.
«Парксен маршĕ» Шупашкарта «Çут çанталăкпа алла-аллăн» экологи уявĕпе уçăлнă. Фестивальте сцена ăстисем çут çанталăк пуянлăхне хушăнтарас, илемне упрас темăна халалланă пултарулăхĕпе савăнтарнă. Шупашкар, Çĕмĕрле, Çĕрпÿ, Хĕрлĕ Чутай, Улатăр районĕсенчи вĕренекенсем хутшăннă. Дружина çамрăкĕсем, «Куча мала» ача-пăча телепрограммине ертсе пыракансем наци паркĕсем çинчен интереслĕ каласа панĕ.
Апрелĕн 23-25 мĕшĕсенче акци Улатăра куçать. Хула шкулĕсенче лекци-калаçусем хĕрÿ иртĕç. Чăваш Енри пĕртен-пĕр «Присурский» патшалăх çут çанталăк усравĕ Улатăр районĕнче вырнаçнă. Дружина членĕсем ăсталăх класĕсем ирттерĕç, станцисем тăрăх вăйăсем йĕркелĕç, хула паркĕсемпе ĕшнисене тасатса тирпейлĕç. Учительсем «Экологи акцине йĕркелесе ирттересси» семинара хутшăнаççĕ.
Апрелĕн 27-мĕшĕнче çамрăксен организацийĕн хастарĕсем Шăмăршă тăрăх утса тухĕç. Мероприятие «Чăваш вăрманĕ» наци паркĕн администрацийĕ йĕркелет. Акцие Шупашкар, Вăрмар, Çĕрпÿ районĕсенче вĕçленĕ май çут çанталăк тусĕсем 3500 тĕп йывăç лартма палăртнă. Экологи кунĕсене пин çын ытла хутшăнмалла.