22 апреля 2009 г.
ЫРĂ йăлана малалла тăсса, Шăмăршăри ача-пăча ÿнер шкулĕн музыка уйрăмĕнче вĕренекенсем райцентрти Культура керменĕнче отчетлă концерт кăтартрĕç. Концерт курма килнисем малтан фойери тĕрлĕ ÿкерчĕксемпе – художество уйрăмĕнче вĕренекенсен творчество ĕçĕсемпе паллашрĕç. Илемлĕ те тарăн шухăшлă ÿкерчĕксем куракансен чун-чĕринче çепĕç туйăмсем çуратрĕç.
Ачасене хавхалану кÿрсе концерт программине ÿнер шкулĕн преподавателĕсен «Каприс» ансамблĕ уçрĕ. «Александра» юрра вăл виçĕ сасăпа илемлĕн шăрантарчĕ. Малалла вара сцена çине пĕчĕк солистка – 6 çулти Е. Фомина тухрĕ. Халăх инструменчĕсен оркестрĕпе (ертÿçи – Р.Архипова) пĕрле вăл «Веселые гуси» юрра кăмăла каймалла юрласа пачĕ. Çĕнĕрен йĕркеленĕ оркестр концерта питĕ илемлетнине те палăртмалла.
Гитарăсен ансамблĕн (преподавателĕ Р.Архипова) кĕввисемпе юррисем – солистсем гитара каласа юрларĕç – чуна пырса тиврĕç. Н. Угарина вĕренекен шăрантарнă «Клен ты мой опавший» романса та куракансем ăшшăн йышăнчĕç. Аккордионсем те (преподавателĕ С. Никишина) хăйсен «хĕм сапакан» кĕввисемпе кашнинех тулли киленÿ кÿчĕç. М. Ермошкин «На лужайке» пьесăпа çу кунĕсене аса илтерчĕ.
Вокалистсем (преп. Т. Яковлева) концерт программине çепĕç те янăравлă сассисемпе хитрелетрĕç. Кунта, паллах, чи малтан Е. Муромцевана палăртмалла. Катя эстрада юррисене питĕ ăста шăрантарчĕ. Пултаруллă солистка тĕрлĕ фестивальсемпе конкурссене те хутшăнать, вĕсенчен Дипломсемпе таврăнать. М. Константиновапа С. Полковников тата Н. Мердеевапа А. Яковлев дуэтпа юрланине те килĕштерчĕç залра ларакансем.
Моцарт музыки нихăçан та кивелмĕ. К. Севрюгин вĕренекен (преп. К.Хазиева) унăн пьессине баянпа ăста каларĕ. Кăтартуллă «Фламинго» ташă ушкăнĕ тĕрлĕ ташăсемпе савăнтарчĕ.
Ачасен пуян содержаниллĕ концерчĕ куракансен асĕнче чылайлăха асра юлĕ.