25 апреля 2009 г.
ПĔЧĔККИСЕМПЕ ĕçлекен воспитатель профессине Г.Сергеева (хĕр чухнехи хушамачĕ – Быкова) шкул пĕтернĕ хыççăнах суйласа илнĕ. 1982 çулта Шупашкарти педагогика училищинчен вĕренсе тухсан унăн ĕç биографийĕ Карапай Шăмăршăри ача садĕнче пуçланнă. Каярахпа Шăмăршăри «Солнышко» ача садне ĕçлеме куçнă. 1995 çултанпа вара «Ромашка» ача садĕнче вăй хурать. Г.Сергееван педагог стажĕ 27 çулпа танлашать.
Галина Леонтьевна – ăшă кăмăллă, професилле ăсталăхпа ĕçлесе пыракан воспитатель. Ăна коллективра та, ачасен ашшĕ-амăшĕсем те хисеплеççĕ. Вăл пĕчĕккисемпе яланах тимлĕ, вĕсемпе кăмăллăн калаçать.
Хальхи вăхăтра Г.Сергеева аслă ушкăнри ачасемпе ĕçлет. Хăйĕнпе пĕрле ĕçлекен Е.Петрова воспитательпе пĕрле группăри ачасем тивĕçлĕ пĕлÿ илччĕр, ÿт-пÿ тĕлĕшĕнчен лайăх аталанса ÿсчĕр тесе тимлеççĕ, пĕчĕккисемпе тĕрлĕ мероприятисем йĕркелеççĕ. Раççей Федерацийĕн («Детство») тата Чăваш Республикин («Воспитание ребенка-дошкольника») Вĕрентÿ министерствисем çирĕплетнĕ программăсене туллин пурнăçлама тăрăшаççĕ воспитательсем.